មន្ត្រី ៖ ស្ថានភាពសិទ្ធិមនុស្សនៅកម្ពុជា មិនល្អឥតខ្ចោះនោះទេ តែមានការវិវត្តន៍ជាវិជ្ជមាន

នៅក្នុងវេទិកាពិភាក្សា ស្ដីពី “វឌ្ឍនភាពនៃវិស័យសិទ្ធិមនុស្ស និងយុតិ្តធម៌នៅកម្ពុជា” នាព្រឹកថ្ងៃទី ២៩ ខែមិថុនានេះ លោក ជិន ម៉ាលីន អនុប្រធានគណៈកម្មាធិការសិទ្ធិមនុស្សកម្ពុជា និងជារដ្ឋលេខាធិការក្រសួងយុត្តិធម៌ បានលើកឡើថា នៅលើពិភពលោកនេះ គ្មានប្រទេសណាមួយ មានស្ថានភាពសិទ្ធិមនុស្សល្អឥតខ្ចោះនោះទេ ហើយសម្រាប់ប្រទេស កម្ពុជាក៏ដូច្នេះដែរ។  

លោក ជិន ម៉ាលីន បានថ្លែងថា ស្ថានភាពសិទ្ធិមនុស្សនៅកម្ពុជា មិនល្អឥតខ្ចោះនោះទេ តែមានការវិវត្តន៍ជាវិជ្ជមាន ហើយមានភាពល្អប្រសើរឡើង។ លោកបន្ថែមថា ជាទូទៅរឿងសិទ្ធិមនុស្សនេះ គ្មានប្រទេ​សណាមួយ ដែលមានភាពល្អឥតខ្ចោះនោះទេ ដោយមានបញ្ហាទៅតាមបរិបទ នៃប្រទេសនីមួយៗ។

លោករដ្ឋលេខាធិការ បន្ថែមទៀតថា «សូម្បីប្រទេសបិតាប្រជាធិបតេយ្យ ក៏គាត់មានបញ្ហាសិទ្ធិមនុស្ស តាមបែបរបស់គាត់ យើងក៏មានបញ្ហាតាមរបស់យើង ក៏ប៉ុន្តែសួរថាតើ វាមានវឌ្ឍនភាព មានការរីកចម្រើនវាមាន»។

បើតាមលោក ជិន ម៉ាលីន ជាទូទៅការវាយតម្លៃមួយ ដែលមានលក្ខណៈវិទ្យាសាស្រ្ដ ពាក់ព័ន្ធនឹងបញ្ហាសិទ្ធិមនុស្សនេះ គឺផ្អែកទៅលើគោលការណ៍ចំនួនពីរ គឺទីមួយ. ផ្អែកទៅលើបរិបទរបស់ប្រទេសនោះផ្ទាល់ និងទីពីរ. ផ្អែកទៅលើបរិបទតំបន់៕

អត្ថបទ៖ ឃួន សុភ័ក្រ