សម្ដេចតេជោ​ស្នើឱ្យដាក់ថវិកាជាតិ​បញ្ចូលក្នុង​គម្រោងដោះមីន ​ដើម្បីផ្ដាច់ព្រាត់​បញ្ហាមីន

សម្ដេចតេជោ ហ៊ុន សែន ​នាយករដ្ឋមន្ត្រីកម្ពុជា​ នៅថ្ងៃទី ០១ ខែកក្កដា ឆ្នាំ ២០២២នេះ ​បានស្នើឱ្យ​អាជ្ញាធរ​មីន​ធ្វើការផ្ដាច់ព្រាត់ទៅលើបញ្ហាដោះមីននៅកម្ពុជា​ ហើយចាប់ផ្ដើមដាក់ខេត្ត​ ស្រុក ឃុំមួយ​ចំនួន​ជាតំបន់​គ្មានមីន។

សម្ដេចតេជោ ហ៊ុន សែន មានប្រសាសន៍នៅក្នុងពិធីអបអរសាទរទិវាមច្ឆជាតិ ០១ កក្កដា ឆ្នាំ២០២២ នៅអាងទឹកត្រពាំងថ្ម ឃុំប៉ោយចារ ស្រុកភ្នំស្រុក ខេត្តបន្ទាយ​មានជ័យ ដោយសម្ដេចបានបញ្ជាឲ្យដាក់កម្លាំងចុះដោះមីន នៅតំបន់ឃុំ​ប៉ោយ​ចារ និងអាងត្រពាំងថ្ម ដើម្បីប្រកាសតំបន់នោះ ជាតំបន់គ្មានមីន និងជាតំបន់សុវត្ថិភាពឱ្យបានឆាប់បំផុតត្រឹមចុងឆ្នាំនេះ។

សម្តេចតេជោ ហ៊ុន សែន ក៏ថ្លែងជំរុញឲ្យចាប់ផ្ដើមប្រកាសដាក់ខេត្ត ស្រុក និងឃុំ ជាបណ្ដើរៗជាតំបន់គ្មានមីន ដោយស្នើឱ្យលោក អូនព័ន្ធ មុនីរ័ត្ន រដ្ឋមន្ត្រីក្រសួងសេដ្ឋកិច្ច ដាក់បញ្ចូលថវិកាជាតិសម្រាប់ឆ្នាំ ២០២៣-២០២៤ ជាដំណាក់ៗខាងមុខ ដើម្បីបង្ហើយការងារដោះមីន ហើយចាប់ផ្ដើមប្រកាសបញ្ចប់ខេត្ត ស្រុក ឃុំ ប្រកាសថាជាតំបន់គ្មានមីនតែម្ដង។ 

សម្ដេចតេជោ មានប្រសាសន៍ថា «កន្លែងខ្លះទៀត យើងត្រូវការតែលុយ ៥ ម៉ឺនដុល្លារទេ យើងទៅរកសុំបរទេស ពិបាកណាស់ ឥឡូវដាក់ចូលក្នុងថវិកាជាតិ ដើម្បីបញ្ចប់នៅកន្លែមួយចំនួនដែលវាជិតអស់ហើយ ប៉ុន្តែវាខ្វះលុយដោះកម្លាំងដោះមីនមាន ជាកម្លាំងស៊ីម៉ាក់ និងវិស្វកម្មកងទ័ព»។

សម្ដេចតេជោ ហ៊ុន សែន ក៏បានអំពាវនាវដល់វិស័យឯកជន ក្នុងការចូលរួមសកម្មភាពដោះមីន ដើម្បីឱ្យកម្ពុជាក្លាយជាប្រទេសដែលគ្មានមីនតាមការគ្រោងទុក៕

អត្ថបទ៖ កោះកែវ