សម្តេច ហេង សំរិន៖ ​​ជោគជ័យ​​លើការ​បោះឆ្នោត​ឃុំ​-សង្កាត់ ​​បញ្ជាក់ថា ប្រជាជន​​ត្រូវ​ការគណបក្សប្រជាជនដឹកនាំ​បន្ត​

ប្រសាសន៍របស់សម្តេចមហាពញ៉ាចក្រី ហេង សំរិន ​ប្រធានកិត្តិយសគណបក្សប្រជាជនកម្ពុជា​បាន​ធ្វើឡើង​នៅក្នុងសុន្ទរកថា បើក​សន្និបាតគណៈកម្មាធិការកណ្ដាលវិសាមញ្ញ នាព្រឹកថ្ងៃទី១៦​ ខែកក្កដា ឆ្នាំ២០២២ នេះ។

បើតាមសម្តេចមហាពញ៉ាចក្រី ហេង សំរិន​​ ដំណើរការនៃការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ​២០២២ បានប្រព្រឹត្តទៅប្រកបដោយលក្ខណៈសេរី ត្រឹមត្រូវ យុត្តិធម៌ ក្នុងបរិយាកាសអព្យាក្រឹត សន្តិសុខ របៀបរៀបរយ គ្មានអំពើហឹង្សា និងការគំរាមកំហែងឡើយ​។​
​

សម្តេចបញ្ជាក់យ៉ាងនេះថា “​ជោគជ័យដ៏ត្រចះត្រចង់លើការ​បោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ កាលពីថ្ងៃទី៥ ខែមិថុនា ឆ្នាំ២០២២ថ្មីៗនេះ បញ្ជាក់ថា ប្រជាជនកម្ពុជានៅតែត្រូវការតួនាទីរបស់គណបក្សប្រជាជនកម្ពុជាបន្តទៀតក្នុងការដឹកនាំនាវា​កម្ពុជាឆ្ពោះទៅកាន់ភាពសម្បូររុងរឿង និងវិបុលភាព”។​

ទោះជាយ៉ាងណា សម្តេចមហាពញ៉ាចក្រី ហេង សំរិន​ អះអាងថា ​ជ័យជម្នះ ​និងសមិទ្ធផល ឬស្នាដៃដែលយើងសម្រេចបានលើគ្រប់ផ្នែក គ្រប់វិស័យ មិនមែនមានន័យថា រាល់​ការខិតខំរបស់​យើងមិនមានជួបឧបសគ្គ ឬបញ្ហាប្រឈម​នោះឡើយ​ ប៉ុន្តែអាស្រ័យដោយគណបក្សមានភាពត្រឹមត្រូវខាងនយោបាយ មានការគាំទ្រពី​ប្រជាជនមានរចនាសម្ព័ន្ធចាត់តាំងរឹងមាំ មានធន​ធានមនុស្សប្រកបដោយគុណធម៌ និងសមត្ថភាពមានសាមគ្គីភាព ឯកភាពផ្ទៃក្នុងរឹងមាំ និងមានរបៀ​បរបបធ្វើការត្រឹមត្រូវនោះ ទើបធ្វើឱ្យយើងជម្នះបាននូវការលំបាកទាំងឡាយ ជាពិសេសធ្វើឱ្យបរាជ័យនូវរាល់ឧបាយកលរបស់ពួកប្រឆាំងជ្រុលនិយម ដែលតែងយកជើងរាទឹក និងប៉ុនប៉ងបំផ្លាញដល់ដំណើរការដឹកនាំរបស់គណបក្ស​ប្រជាជនកម្ពុជា។

ជាមួយគ្នានោះ សម្តេចមហាពញ៉ាចក្រី ហេង សំរិន​ ​កោតសរសើរ​ចំពោះ​ក្រុមការងារចុះជួយមូលដ្ឋាន និងអង្គការមហាជន​គណបក្សគ្រប់ផ្នែក​ ព្រមទាំង​មន្ត្រី និងសមាជិក សមាជិកាគណបក្សទាំងអស់ដែលបានខិតខំប្រឹងប្រែងធ្វើឱ្យសម្រេច រាល់ភារកិច្ចដែលគណបក្ស និងប្រជាជនប្រគល់ជូន​។ ការខិតខំ និងអំពើល្អរបស់យើងតែងទទួល​បានការតបស្នងតាមរយៈសន្លឹកឆ្នោតពីប្រជាជនវិញនៅគ្រប់ពេលបោះឆ្នោត៕

អត្ថបទ៖ កោះកែវ​​