ព័ត៌មានជាតិ

ផ្លូវលំតាមដងទន្លេមេគង្គ ១ ខ្សែ ធ្លាប់តែពិបាកធ្វើដំណើរ ត្រូវបានជួសជុលដោយផ្លូវបេតុងជំនួសវិញ

បានផុស

២ years មុន

នៅ

ថ្ងៃពុធ ២០ កក្កដា ២០២២

ដោយ

ផ្លូវលំតាមដងទន្លេមេគង្គ ១ ខ្សែប្រវែង ១៦ គីឡូម៉ែត្រ ធ្លាប់តែមានភាពលំបាក ក្នុងការធ្វើដំណើរ សម្រាប់សិស្សានុសិស្ស និងប្រជាពលរដ្ឋ ដឹកកសិផល ទៅកាន់ទីផ្សារពេលនេះត្រូវបានមន្ទីរអភិវឌ្ឍន៍ខេត្តស្ទឹងត្រែង បានសាងសង់ផ្លូវបេតុងជំនួសវិញ ដើម្បីសម្រួលដល់ការធ្វើចរាចរណ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សយ គា អនុប្រធានមន្ទីរអភិវឌ្ឍន៍ជនបទខេត្តបានដឹងឲ្យថា ផ្លូវដែលកំពុងសាងសង់ថ្មីនេះចេញពីចំណុចភូមិកាំងមេម៉ាយសង្កាត់ព្រះបាទ ក្រុង-ខេត្តស្ទឹងត្រែងទៅដល់ភូមិដំរីផុង ឃុំកោះសំពាយ ស្រុកសៀមបូក ខេត្តស្ទឹងត្រែង ត្រូវបានសាងសង់ថ្មី ជាផ្លូវបេតុងជំនួសផ្លូវគ្រួសក្រហម ដើម្បីប្រជាពលរដ្ឋធ្វើចរាចរណ៍ទៅមកបានងាយស្រួល និងបានលើកកម្ពស់សោភ័ណភាពនៅតាមតំបន់នេះផងដែរ ។

លោកអនុប្រធានមន្ទីរអភិវឌ្ឍន៍ជនបទខេត្តស្ទឹងត្រែងបានបញ្ជាក់បន្ថែមថា លូ-ស្ពាន-ផ្លូវ-តាមបណ្តោយជួរមាត់ទន្លេនេះ ក្រុមការងារបច្ចេកទេសសាងសង់និងប្រឹងប្រែងស្ថាបនាឱ្យហើយរួចរាល់ជាស្ថាពរទៅតាមផែនការ នៅចុងឆ្នាំ ២០២២ នេះ។ លោកបន្តថា ផ្លូវមួយខ្សែនេះជាបណ្តាញតភ្ជាប់គ្នា រវាងទឹកដីក្រុងស្ទឹងត្រែង ទៅទីរួមស្រុកសៀមបូក ហើយប្រជាពលរដ្ឋយើងរស់នៅជួរមាត់ទន្លេមេគង្គ និងមានភាពងាយស្រួលក្នុងការធ្វើចរាចរណ៍ទៅមក ព្រោះបានសាងសង់លើកឱ្យខ្ពស់ផុតពីទឹក មិនឱ្យទឹកលិចនៅខែវស្សាទៀតទេ។

លោក ម៉ៅ ឃីម ប្រជាពលរដ្ឋនៅភូមិកាំងដីសបានកត់សំគាល់ថា ការអភិវឌ្ឍន៍ផ្លូវស្ពានមួយខ្សែនេះពិតជាបានឆ្លើយតបទៅនិងការចង់បានរបស់ប្រជាពលរដ្ឋ ព្រោះរាជរដ្ឋាភិបាលបានផ្លាស់ប្តូរយុទ្ធសាស្ត្រ ពីផ្លូវគ្រួសក្រហម មកស្ថាបនាជាផ្លូវបេតុងវិញ ព្រោះវាមានភាពរឹងមាំប្រើប្រាស់បានយូរអង្វែង ទោះបីថាការមកសាងសង់មានភាពយឺតយ៉ាវមែន តែវាល្អជាងដែលមិនបានមកធ្វើសោះ។

លោកបញ្ជាក់ថា ពេលផ្លូវនេះសាងសង់ហើយនិងមានភាពងាយស្រួលឡើងវិញទាំងសិស្សានុសិស្សទៅសាលារៀន កសិករដឹកកសិផលទៅកាន់ទីផ្សារនៅទីរួមខេត្ត ប្រជាពលរដ្ឋមានជំងឺឈឺថ្កាត់ទៅមន្ទីរពេទ្យបង្អែកក៏បានឆាប់រហ័សផងដែរ។

សូមបញ្ជាក់ថា៖ ផ្លូវបេតុងថ្មីនេះ មានទទឹង ៥ ម៉ែត្រ បណ្តោយ ១៦ គីឡូម៉ែត្រ ដាក់លូចំនួន ៣២ កន្លែង លូប្រអប់ ០៧ កន្លែង ស្ពានចំនួន ០៩ កន្លែង ជាអំណោយរបស់រាជរដ្ឋាភិបាល អនុវត្ត គម្រោង សាងសង់ដោយក្រសួងអភិវឌ្ឍន៍ជនបទ សាងសង់ក្នុងដំណាក់កាលទី ១ និងបន្តសាងសង់តភ្ជាប់ទៅឃុំស្រែក្រសាំងនិងឃុំអូរម្រះក្នុងស្រុកសៀមបូកនេះបន្ថែមទៀត ក្នុងចម្ងាយផ្លូវប្រវែងជាង ១០ គីឡូម៉ែត្រនៅឆ្នាំ ២០២៣ខាងមុខ៕

អត្ថបទ៖ ងិនលីម