មកដឹងបច្ចុប្បន្នភាព បុរសនីហ្សេរីយ៉ា កើតជំងឺអុតស្វា និងអ្នកប៉ះពាល់ទាំង ៥ នាក់

លោកស្រី វេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យ ក្រសួងសុខាភិបាល បានឱ្យ “កម្ពុជាថ្មី” ដឹងមុននេះថា នៅថ្ងៃទី១ ខែសីហា ឆ្នាំ២០២២ វេលាម៉ោង ២២:១០ នាទីយប់ បុរសជនជាតិនីហ្សេរីយ៉ាម្នាក់ កំពុងនៅសម្រាកព្យាបាលក្នុងមន្ទីរពេទ្យ ដោយនៅមានវិជ្ជមានវីរុសអុតស្វានៅឡេីយ។ ស្ថានភាពសុខភាពគាត់មិនអីទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីវេជ្ជបណ្ឌិតបញ្ជាក់បន្ថែមថា អ្នកពាក់ព័ន្ធទាំង ៥ នាក់នោះ ក៏មិនមានរោគសញ្ញាអ្វីដែរ ស្ថានភាពធម្មតា ប៉ុន្តែត្រូវបន្តតាមដានសុខភាពនៅផ្ទះដាច់ដោយឡែក។

គួរបញ្ជាក់ថា បុរសជនជាតិនីហ្សេរីយ៉ាឆ្លងជំងឺអុតស្វានេះ មានឈ្មោះ អូសម៉ុងសាហាហ្សីរីម មាន អាយុ ២៧ឆ្នាំ បានគេចខ្លួនពីប្រទេសថៃ ហើយបានធ្វើដំណើរចូលមកប្រទេសកម្ពុជា ត្រូវបានសមត្ថកិច្ចរាជធានីភ្នំពេញធ្វើការឃាត់ខ្លួនកាលពីល្ងាចថ្ងៃទី ២៣ ខែកក្កដា នៅម្តុំផ្សារដើមថ្កូវ ខណ្ឌចំការមន រាជធានីភ្នំពេញ។ បច្ចុប្បន្ននេះបុរសនេះកំពុងសម្រាកព្យាបាលជំងឺនៅមន្ទីរពេទ្យខ្មែរសូវៀត ហើយការព្យាបាលជំងឺមិនបានគិតប្រាក់ទេ៕