ព័ត៌មានជាតិ

EU សម្លឹងឆ្ពោះទៅសម្តេចតេជោ ធ្វើជាប្រធាន កិច្ចប្រជុំកំពូលរម្លឹកអនុស្សាវរីយ៍ អាស៊ាន-អឺរ៉ុប

បានផុស

៤ years មុន

នៅ

ថ្ងៃសុក្រ ៥ សីហា ២០២២

ដោយ

សហភាពអឺរ៉ុប EU សម្លឹងឆ្ពោះទៅរកការស្វាគមន៍សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីធ្វើជាប្រធាន នៃកិច្ចប្រជុំកំពូលរម្លឹកខួបអនុស្សាវរីយ៍ខួបទី៥៥ រវាងអាស៊ាន និងសហភាពអឺរ៉ុប។

ថ្លែងក្នុងសន្និសីទកាសែត នៅយប់ថ្ងៃទី០៤ ខែសីហានេះ លោក គង់ ភោគ អ្នកនាំពាក្យកិច្ចប្រជុំរដ្ឋមន្ត្រីការបរទេសអាស៊ាន លើកទី៥៥ និងកិច្ចប្រជុំពាក់ព័ន្ធ បានឱ្យដឹងថា ចំពោះកិច្ចប្រជុំរដ្ឋមន្ត្រីការបរទេសអាស៊ាន និងសហភាពអឺរ៉ុប បានអនុម័តលើផែនការសកម្មភាពស្ដីពី ភាពជាដៃគូយុទ្ធសាស្ត្រអាស៊ាន-សហភាពអឺរ៉ុប សម្រាប់ឆ្នាំ២០២៣ រហូតដល់ឆ្នាំ២០២៧ ដែលនឹងតម្រង់ទិសកិច្ចសហប្រតិបត្តិការសម្រាប់ភាគីទាំងពីរ សម្រាប់រយៈពេល ៥ ឆ្នាំទៅមុខ។

លោក គង់ ភោគ បញ្ជាក់បន្ថែមថា៖ “កិច្ចប្រជុំក៏បានទន្ទឹងរង់ចាំកិច្ចប្រជុំកំពូលរម្លឹកខួបអនុស្សាវរីយ៍អាស៊ាន-សហភាពអឺរ៉ុប នៅថ្ងៃទី ១៤ ខែធ្នូ ឆ្នាំ២០២២ នៅទីក្រុងប្រ៊ុចសែល ដើម្បីរំឭកខួបលើកទី៥៥ នៃទំនាក់ទំនងកិច្ចសន្ទនានេះ។ សហភាពអឺរ៉ុបសម្លឹងឆ្ពោះទៅរកការស្វាគមន៍សម្តេចតេជោនាយករដ្ឋមន្ត្រី ដើម្បីធ្វើជាប្រធាន នៃកិច្ចប្រជុំកំពូលរម្លឹកខួបអនុស្សាវរីយ៍ជាមួយនឹងភាគីអឺរ៉ុប”។

លោក គង់ ភោគ មានប្រសាសន៍បន្តថា កិច្ចប្រជុំក៏បានបញ្ជាក់អំពីការសហការផ្នែកនយោបាយ សន្តិសុខដើម្បីពង្រឹងកិច្ចសហប្រតិបត្តិការដែនសមុទ្រជាមួយសហភាពអឺរ៉ុប ដោយផ្អែកលើកិច្ចសហការលើវិស័យអាទិភាពក្នុងចក្ខុវិស័យស្តីពី ឥណ្ឌូប៉ាស៊ីហ្វិក និងយុទ្ធសាស្ត្រសហភាពអឺរ៉ុប សម្រាប់កិច្ចសហប្រតិបត្តិការនៅឥណ្ឌូប៉ាស៊ីហ្វិច ដោយអនុលោមតាមអាស៊ាន។

ចំពោះកិច្ចសហប្រតិបត្តិការសេដ្ឋកិច្ច កិច្ចប្រជុំរដ្ឋមន្ត្រីការបរទេសអាស៊ាន និងសហភាពអឺរ៉ុប បានរំឭកឡើងវិញអំពីសារៈសំខាន់នៃការបន្តការងារឆ្ពោះទៅរកកិច្ចព្រមព្រៀងពាណិជ្ជសេរីអាស៊ាន-សហភាពអឺរ៉ុប ទន្ទឹមការរង់ចាំការចុះហត្ថលេខាលើកិច្ចព្រមព្រៀងដឹកជញ្ជូនផ្លូវអាកាសទូលំទូលាយអាស៊ាន-សហភាពអឺរ៉ុប និងក្រុមការងាររួមគ្នាលើប្រេងដូង ដើម្បីដោះស្រាយវិវាទនេះ ជំរុញឱ្យមានការធ្វើពាណិជ្ជកម្មទៅលើវិស័យមួយនេះឱ្យបានទៅមុខ។

គួរបញ្ជាក់ថា កិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធ គឺជាវេទិកាដ៏មានសារៈសំខាន់សម្រាប់អាស៊ាន ក៏ដូចជាដៃគូសន្ទនា ដើម្បីពិនិត្យ និងពិភាក្សាលើបញ្ហាទាំងឡាយ ហើយដាក់ចេញជាសេចក្តីសម្រេចចិត្តនានាសម្រាប់មេដឹកនាំកំពូលរបស់អាស៊ាន និងប្រទេសដៃគូសន្ទនា សម្រេចក្នុងកិច្ចប្រជុំកំពូលរបស់អាស៊ាន និងកិច្ចប្រជុំពាក់ព័ន្ធនានា នោះ៕

អត្ថបទ៖ ច័ន្ទ វីរៈ