ព្រឹកនេះ អង្គភាពអ្នកនាំពាក្យរាជរដ្ឋាភិបាល រៀបចំសន្និសីទសារព័ត៌មាន ស្ដីពី “ស្ថានភាពនៃការជួញដូរមនុស្សនៅកម្ពុជា”

អង្គភាពអ្នកនាំពាក្យរាជរដ្ឋាភិបាល នៅព្រឹកថ្ងៃទី ១២ ខែសីហានេះ នឹងរៀបចំសន្និសីទសារព័ត៌មាន ស្ដីពី “ស្ថានភាពនៃការជួញដូរមនុស្សនៅកម្ពុជា” នៅទីស្ដីការគណៈរដ្ឋមន្ត្រី។ វាគ្មិនកិត្តិយស ដែលនឹងអញ្ជើញចូលរួម រួមមាន៖ តំណាងមកពីក្រសួងមហាផ្ទៃ, ក្រសួងយុត្តិធម៌, ក្រសួងការងារ និងបណ្ដុះបណ្ដាលវិជ្ជាជីវៈ, ក្រសួងសង្គមកិច្ច អតីតយុទ្ធជន និងយុវនីតិសម្បទា, និងអង្គការដៃគូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សន្និសីទសារព័ត៌មាននេះ រៀបចំឡើងក្នុងគោលបំណង ដើ​ម្បីឆ្លើយតបឲ្យទាន់សភាពការណ៍ ដែលសហរដ្ឋអាមេរិក បានសរសេរក្នុងរបាយការណ៍ប្រចាំឆ្នាំ ស្ដីពី ការជួញដូរមនុស្សនៅលើពិភពលោក របស់ក្រសួងការបរទេសអាមេរិក ដែលដាក់កម្ពុជាក្នុងចំណាត់ថ្នាក់លេខ ៣ ស្មើនឹងកម្ពុជា មិនបានធ្វើអ្វីសោះដែលជារឿងមិនពិត ជាហេតុផលនៃការដាក់ទណ្ឌកម្មថែមទៀត គឺជារឿងអយុត្តិធម៌មិនអាចទទួលយកបាន។

សេចក្ដីជូនដំណឹង របស់អង្គភាពអ្នកនាំពាក្យរាជរដ្ឋាភិបាល បានលើកឡើងថា កន្លងមក រាជរដ្ឋាភិបាល ដៃគូជាតិ និងអន្តរជាតិ បានឲ្យដឹងច្បាស់អំពីកិច្ចខិតខំប្រឹងប្រែងរួមគ្នា ក្នុងសកម្មភាពប្រយុទ្ធប្រឆាំងអំពើជួញដូរមនុស្ស និងទទួលបានលទ្ធផលជាច្រើន។

ក្រសួង​ការបរទេស​អាមេរិក កាលពី​អំឡុង​ខែកក្កដាកន្លងទៅនេះ បានចេញរបាយការណ៍​ប្រចាំ​ឆ្នាំ ស្តី​ពី​ការ​ជួញ​ដូរ​មនុស្សនៅ​លើ​ពិភព​លោក​ ហើយក្នុងនោះ ក៏មានប្រទេសកម្ពុជាផងដែរ។ របាយការណ៍នេះ បានទម្លាក់​កម្រិត​កម្ពុជា​ពី​ចំណាត់ថ្នាក់​ទី​ ២​ មកចំណាត់​ថ្នាក់​ទី​ ៣​ ដែល​ជា​ចំណាត់​ថ្នាក់​ទាប​​មួយ ពាក់ព័ន្ធនឹងការជួញ​ដូរ​មនុស្ស។

កាលពីថ្ងៃទី ៩ ខែសីហា ឆ្នាំ ២០២២កន្លងទៅនេះ សម្ដេចក្រឡាហោម ស ខេង ឧបនាករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអញ្ជើញដឹកនាំកិច្ចប្រជុំផ្សព្វផ្សាយផែនការប្រតិបត្តិការ បង្កើនការប្រយុទ្ធប្រឆាំងគ្រប់ទម្រង់នៃអំពើជួញដូរមនុស្ស ជួញដូរពលកម្ម និងអាជីវកម្មផ្លូវភេទ នៅទីស្ដីការក្រសួងមហាផ្ទៃ។

នៅក្នុងឱកាសនោះ សម្ដេចក្រឡាហោម ស ខេង បានគូសបញ្ជាក់ជូនអង្គប្រជុំអំពីការវិវត្តន៍ថ្មីៗ ពាក់ព័ន្ធនឹងការងារប្រយុទ្ធប្រឆាំងអំពើជួញដូរមនុស្សនៅកម្ពុជា។ ក្នុងនោះសម្ដេច ក៏បានមានប្រសាសន៍ដល់ការដាក់ចំណាត់ថ្នាក់ របស់ក្រសួងការបរទេសអាមេរិកមកលើកម្ពុជា ថាជាប្រទេសគ្មានឆន្ទៈប្រយុទ្ធប្រឆាំងអំពើជួញដូរមនុស្សផងដែរ។

សម្ដេចក្រឡាហោម ស ខេង បានបញ្ជាក់ទៀតថា រាជរដ្ឋាភិបាលកម្ពុជា ដែលមានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្សជាសេនាធិការ បានខិតខំប្រឹងប្រែងប្រកបដោយឆន្ទៈ ក្នុងការងារប្រយុទ្ធប្រឆាំងអំពើជួញដូរមនុស្ស និងថាទោះជាភាគីអាមេរិកដាក់ចំណាត់ថ្នាក់បែបណាក៏ដោយ ក៏កម្ពុជាចាត់ទុកចំណាត់ថ្នាក់នេះជាមូលដ្ឋានមួយ ក្នុងការបន្តការងារប្រយុទ្ធប្រឆាំងអំពើជួញដូរមនុស្សរបស់ខ្លួនដែរ៕

អត្ថបទ៖ ឃួន សុភ័ក្រ