ព័ត៌មានជាតិ

ចិន ផ្តល់សម្ភារៈការិយាល័យតម្លៃ២លានយ័ន ដល់គណៈកម្មាធិការសម្របសម្រួលអន្តររដ្ឋាភិបាលកម្ពុជា

បានផុស

៦ years មុន

នៅ

ថ្ងៃសុក្រ ២៥ ធ្នូ ២០២០

ដោយ

ពិធីប្រគល់សម្ភារៈការិយាល័យរបស់ក្រសួងការបរទេសនៃសាធារណរដ្ឋប្រជាមានិតចិន បានធ្វើឡើងកាលពីព្រឹកថ្ងៃទី២៥ ខែធ្នូ ឆ្នាំ២០២០នេះ ក្រោមអធិបតីភាព លោកឧបនាយករដ្ឋមន្ត្រី ហោ ណាំហុង និងខាងភាគីចិន តំណាង ដោយលោក Wang Wentian ឯកអគ្គរដ្ឋទូតចិនប្រចាំកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសនោះ លោកឯកអគ្គរដ្ឋទូតចិន បានលើកថា ក្រសួងការបរទេសចិន បានផ្ដល់ជំនួយឧបករណ៍សម្ភារៈការិយាល័យ ដែលមានទឹកប្រាក់ចំនួន២ លានយ័ន ដែលក្រសួងការបរទេសចិនផ្ដល់ជូនគណៈកម្មាធិការខាងកម្ពុជាគឺដើម្បីបង្កើនប្រសិទ្ធភាពការងារខាងគណៈកម្មាការ ដើម្បីទំនាក់ទំនងកិច្ចសហប្រតិបត្តិការកម្ពុជា-ចិនឲ្យបានកាន់តែជិតស្និទ្ធឡើង។

ចំណែកលោកឧបនាយករដ្ឋមន្ដ្រី បានសម្តែងនូវការរីករាយណាស់ ក្នុងនាមគណៈកម្មាធិការកម្ពុជាក្នុងក្របខ័ណ្ឌគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន ក្នុងឱកាសពិធីប្រគល់អំណោយសម្ភារៈការិយាល័យយ៉ាងច្រើន ដែលជាអំណោយរបស់ក្រសួងការបរទេសចិន ដែលមានតម្លៃ២លានយ័ន ផ្ដល់ជូនគណៈកម្មាធិការកម្ពុជា ដើម្បីអនុវត្តភាពជាដៃគូយុទ្ធសាស្ត្រគ្រប់ជ្រុងជ្រោយ រវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន ព្រមទាំង“ផែនការសកម្មភាព ៥ឆ្នាំដើម្បីបង្កើតសហគមន៍វាសនារួមកម្ពុជា-ចិន(២០១៩-២០២៣)”ឲ្យមានប្រសិទ្ធភាពខ្ពស់។

លោកឧបនាយករដ្ឋមន្ត្រី ហោ ណាំហុង បានបញ្ជាក់ថា ជំនួយឧបត្ថម្ភដ៏សំខាន់នេះ ដែលមានសម្ភារៈការិយាល័យសម្បូរបែបយ៉ាងច្រើន នឹងជួយសម្រួលដល់ការងាររបស់គណៈកម្មាធិការកម្ពុជា ដែលមានស្ថាប័នក្រសួងចំនួន១៧ជាសមាជិក ដើម្បីធ្វើឲ្យកាន់តែស៊ីជម្រៅកិច្ចសហប្រតិបត្តិការដ៏ជិតស្និទ្ធរវាងប្រទេសទាំងពីរ លើគ្រប់វិស័យ ដើម្បីអនុវត្តឲ្យបានលទ្ធផលល្អ នៃកិច្ចប្រជុំគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន នៅថ្ងៃទី១៦ ខែមិថុនា កន្លងមកជាពិសេសបញ្ជីការងារបន្ទាន់ដែលយើងត្រូវធ្វើឲ្យសម្រេច។ លោកបន្តថា ទស្សនកិច្ចផ្លូវការរបស់លោក វ៉ាង យី ទីប្រឹក្សារដ្ឋ និងជារដ្ឋមន្ត្រីក្រសួងការបរទេស នៃសាធារណរដ្ឋប្រជាមានិតចិន នៅថ្ងៃទី១១-១២ ខែតុលា ឆ្នាំ២០២០ ដើម្បីចូលរួមជាអធិបតីភាពជាមួយ សម្ដេចតេជោនាយករដ្ឋមន្ត្រី នៃព្រះរាជាណាចក្រកម្ពុជា ក្នុងពិធីចុះ ហត្ថលេខាលើកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) ដែលបាននាំឲ្យពាណិជ្ជកម្មរវាងកម្ពុជានិងចិន កាន់តែមានទំហំធំធេងថែមទៀត លើសពី១០ប៊ីលានដុល្លារអាមេរិក នៅឆ្នាំ២០២៣ ដែលបានគ្រោងទុក ជាពិសេសការនាំចេញកសិផលកម្ពុជាឲ្យបានច្រើនថែមទៀតទៅប្រទេសចិន

លោកឧបនាយករដ្ឋមន្ត្រី ហោ ណាំហុង បញ្ជាក់ទៀតថា ក្នុងនាមគណៈកម្មាធិការសម្របសម្រួលអន្តររដ្ឋាភិបាលកម្ពុជា បានថ្លែងអំណរគុណយ៉ាងជ្រាលជ្រៅបំផុតចំពោះលោក វ៉ាង យី ទីប្រឹក្សារដ្ឋ និងជារដ្ឋមន្ត្រីក្រសួងការបរទេស នៃសាធារណរដ្ឋប្រជាមានិតចិន និងក្រសួងការបរទេសនៃសាធារណរដ្ឋប្រជាមានិតចិន ដែលបានផ្ដល់នូវសម្ភារៈការិយាល័យអេឡិចត្រូនិកជាច្រើនទាំងនេះ ដើម្បីនឹងសម្រួលការងារគណៈកម្មាធិការសម្រប សម្រួលអន្តររដ្ឋាភិបាលកម្ពុជា។

ក្នុងឱកាសនេះ តាងនាមរាជរដ្ឋាភិបាលកម្ពុជា លោកឧបនាយករដ្ឋមន្ដ្រី បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលនៃសាធារណរដ្ឋប្រជាមានិតចិន ដែលបានជួយឧបត្ថម្ភហិរញ្ញប្បទានយ៉ាងច្រើនជាបន្តបន្ទាប់ដល់កម្ពុជា ជាជំនួយឥតសំណង កម្ចីអត់ការប្រាក់ ឬការប្រាក់ទាប ព្រមទាំងការវិនិយោគ ដែលមានទំហំធំធេង ជារៀងរាល់ឆ្នាំនៅកម្ពុជា

៕

អត្ថបទ៖ កោះកែវ

សូមចុចអាន៖ ផ្លូវសំឡូត- វាលវែង-អូរសោម ដល់កោះកុង ជិះទៅមកបានស្រួល ប្រើពេល ៤ ទៅ ៥ ម៉ោងទៅដល់គោលដៅ