តើរដ្ឋមន្ត្រីណាខ្លះអាចប្រើភាសាបរទេសបានល្អ ក្រៅពីភាសាកំណើត?

យោងតាមការស្រាវជ្រាវ គឺបញ្ជាក់ឲ្យដឹងថា ការចេះភាសាច្រើនធ្វើឲ្យខួរក្បាលគិតបានល្អ ជាងអ្នកចេះភាសាតែមួយ និងមានការយល់ដឹងខាងផ្នែកវប្បធម៌ វិទ្យាសាស្ត្រ និងមានបំណិនទំនាក់ទំនងបានល្អជាង។ បើក្រឡេកមកមើលកម្ពុជា ចំនួនអ្នកសិក្សាភាសាបរទេសក៏មានច្រើនដែរ ក្រៅពីភាសាកំណើតរបស់ខ្លួន គឺភាសាខ្មែរ។  នៅក្នុងនោះ គេសង្កេតឃើញថា រដ្ឋមន្ត្រីមួយចំនួននៃរាជរដ្ឋាភិបាលកម្ពុជា ក៏បានសិក្សា និងចេះភាសាបរទេសច្រើន តួយ៉ាងមានដូចជា ៖

១/ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ។ ប្រមុខការពារជាតិកម្ពុជារូបនេះ មានទីកំណើតលើទឹកដីខេត្តកោះកុង ដែលជាប់ព្រំដែនជាមួយប្រទេសថៃ ហើយសម្ដេច ក៏អាចនិយាយភាសាថៃបានដែរ។  

២/ លោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។ ក្រៅតែពីភាសាខ្មែរដែលជាភាសាកំណើត គឺលោក អូន ព័ន្ធមុនីរ័ត្ន ចេះភាសាអង់គ្លេស និងរុស្ស៊ី។

៣/ លោកឧបនាយករដ្ឋមន្រ្តី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ។ លោកប្រមុខការទូតកម្ពុជា ចេះភាសាបរទេសចំនួនពីរ គឺបារាំង និងអង់គ្លេស។

៤/ លោកទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។ លោកទេសរដ្ឋមន្ត្រី ចេះភាសាបារាំង និងអង់គ្លេស។

៥/ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។ លោក ជាអតីតនិស្សិតបញ្ចប់ការសិក្សាថ្នាក់បណ្ឌិតសេដ្ឋកិច្ចអន្តរជាតិពីប្រទេសរុស្ស៉ី និងអាចប្រើប្រាស់ភាសាបរទេសដល់ទៅចំនួន ៦ភាសា។ ភាសាទាំងនោះរួមមានអង់គ្លេស បារាំង រុស្សី ចិន ថៃ និងឡាវ។

៦/ រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ជា វ៉ាន់ដេត ចេះភាសាអង់គ្លេស និងរុស្ស៊ី។ លោករដ្ឋមន្ត្រី ជា វ៉ាន់ដេត ក៏ជាអតីតនិស្សិតបញ្ចប់ការសិក្សាថ្នាក់បរិញ្ញាបត្រជាន់ខ្ពស់ និងបណ្ឌិតផ្នែកវិទ្យាសាស្ត្រសេដ្ឋកិច្ចនៅប្រទេសរុស្ស៊ីដែរ។

៧/ រដ្ឋមន្ត្រីវ័យក្មេងនៃក្រសួងបរិស្ថាន លោក សាយ សំអាល់ ជាបណ្ឌិតផ្នែកជីវសាស្ត្រពីប្រទេសអូស្ត្រាលី។ កាល​រៀន​នៅ​ប្រទេស​​សិង្ហបុរី (​ពី​ថ្នាក់​ទី៦ ដល់​​ថ្នាក់​ទី៩) លោករដ្ឋមន្ត្រី​​រៀន​​ភាសា​អង់គ្លេស ភាសា​ចិន និង​ភាសា​ម៉ាឡេស៊ី​។

៨/ លោក កើត រឹទ្ធ រដ្ឋមន្ត្រីក្រសួងយុត្តិធម៌ ជាបញ្ញាវន្តខ្មែរ ទទួលបានការសិក្សានៅប្រទេសបារាំង ហើយលោក ចេះភាសាបារាំង និងអង់គ្លេស។

៩/ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ។ លោកស្រី បានបញ្ចប់ការសិក្សាថ្នាក់បណ្ឌិតនៅប្រទេសបារាំង កាលពីឆ្នាំ២០០២ ខណៈភាសាបារាំង លោកស្រីរដ្ឋមន្ត្រី ចេះយ៉ាងស្ទាត់ជំនាញ គួបផ្សំនឹងភាសាអង់គ្លេសផងដែរ៕

ដោយ៖ ធឿន វ៉ាន់សុង