ភ្ញៀវទេសចរដែលមក​កម្សាន្តតាមតំបន់នានា​ក្នុងខេត្តបាត់ដំបង​នាឱកាសបុណ្យភ្ជុំមានចំនួន ជិត១០ ម៉ឺននាក់

បុណ្យភ្ជុំបិណ្ឌនាថ្ងៃដំបូងគឺមានភ្ញៀវទេសចរជាតិ និងអន្តរជាតិ ដែលចូលទៅកំសាន្តតាមតំបន់រមណីយដ្ឋាននានា គឺមានច្រើនគួរឱ្យកត់សម្គាល់បន្ទាប់ពីប្រទេសកម្ពុជាបានធូរស្បើយពីការរាតត្បាតនៃជំងឺកូវីដ១៩។

បើតាមសេចក្តីរាយការណ៍ពីលោក អ៊ុចអ៊ុ ភីនីស្សារ៉ា ប្រធានមន្ទីរទេសចរខេត្ត បានបញ្ជាក់ថា ភ្ញៀវទេសចរដែលមកកំសាន្តតាមតំបន់រមណីយដ្ឋាននានា ក្នុងខេត្តបាត់ដំបងនាថ្ងៃទី២៤ ខែកញ្ញា ឆ្នាំ២០២២ សរុបមានចំនួន ៨១.៨៦៩ នាក់ ដែលអត្រានេះគឺកើនឡើងយ៉ាងខ្ពស់ត្រដែតគួរឲ្យកត់សម្គាល់។

ក្នុងនោះដែរ ចំពោះភ្ញៀវទេសចរជាតិ មានចំនួន ៨១.៧៥៧ នាក់ បើប្រៀបធៀបទៅនឹងឆ្នាំ២០២១ គឺបានកើនឡើង ៩១៩.៤១% ដែលកាលណោះ មានតែចំនួន ៨.០២០ នាក់ ដោយឡែកចំពោះភ្ញៀវទេសចរអន្តរជាតិ (ទេសចរផ្ទៃក្នុង) មានចំនួន ១១២ នាក់ កើនឡើង ១០០% បើប្រៀបធៀបទៅនឹងឆ្នាំ២០២១ មានចំនួន ០០ នាក់។

លោកប្រធានមន្ទីរបានបន្ថែមថា ប៉ុន្តែទោះបីជាយ៉ាងនេះក្តី ក៏មន្ត្រីរបស់លោកនៅតែបន្តការចុះត្រួតពិនិត្យ និងណែនាំដល់ម្ចាស់រមណីយដ្ឋាននីមួយៗ ត្រូវធ្វើយ៉ាងណារក្សាអោយបាននូវ បីការពារ និងបីកុំឲ្យបានខ្ជាប់ខ្ជួន ដើម្បីសុខមាលភាពរបស់ប្រជាពលរដ្ឋគ្រប់រូប និងដើម្បីសង្គមទាំងមូល៕

អត្ថបទ៖ សោ និយមរ័ត្ន