ព័ត៌មានជាតិ

ពលរដ្ឋស្ម័គ្រចិត្តមករស់នៅតំបន់រុនតាឯក នឹងទទួលប័ណ្ណក្រីក្រប្រភេទ ១ ទាំងអស់

បានផុស

១ year មុន

នៅ

ថ្ងៃសៅរ៍ ១ តុលា ២០២២

ដោយ

ពលរដ្ឋដែលស្ម័គ្រចិត្តផ្លាស់ទីលំនៅមករស់នៅតំបន់អភិវឌ្ឍរុនតាឯក ក្នុងស្រុកបន្ទាយស្រី នឹងទទួលបានប័ណ្ណក្រីក្រប្រភេទ ១ សម្រាប់សម្រួលជីវភាពរស់នៅ។

សម្ដេចតេជោ ហ៊ុន សែន បានប្រកាសនៅមុខពលរដ្ឋរាប់ពាន់នាក់នៅព្រឹកនេះថា អ្នកដែលស្ម័គ្រចិត្តចាកចេញពីកន្លែងមិនស្របច្បាប់នៅរមណីយដ្ឋានអង្គរទៅតាំងទីលំនៅថ្មីនៅតំបន់រុនតាឯក នឹងទទួលបានបណ្ណក្រីក្រប្រភេទ ១ ទាំងអស់ ដែលគោលនយោបាយនេះត្រូវបានធានារយៈពេល ១០ ឆ្នាំ។

ដោយឡែកពលរដ្ឋដែលបានកាន់បណ្ណក្រីក្រប្រភេទ ២ រួចហើយ ក៏អនុញ្ញាតិឲ្យប្តូរមកបណ្ណក្រីក្រប្រភេទ ១ វិញដែរ ដើម្បីទទួលបានអត្ថប្រយោជន៍បន្ថែមពីរដ្ឋាភិបាល សម្រាប់គាំទ្រជីវភាពក្នុងការស្ម័គ្រចិត្តមករស់នៅតំបន់អភិវឌ្ឍថ្មីនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពលរដ្ឋជាង ៤ ពាន់គ្រួសារបានស្ម័គ្រចិត្តផ្លាស់មករស់នៅតំបន់អភិវឌ្ឍរុនតាឯក ក្នុងស្រុកបន្ទាយស្រី ខេត្តសៀមរាប។ ការស្ម័គ្រចិត្តផ្លាស់មករស់នៅតំបន់អភិវឌ្ឍរុនតាឯក ក្នុងមួយគ្រួសារនឹងទទួលបានដីចំនួន ១ឡូត៍ ទំហំ ២០ម៉ែត្រ គុណ ៣០ម៉ែត្រ។

យោងតាមរបាយការណ៍របស់ក្រសួងរៀបចំដែនដី នគរោបនីយកម្ម និងសំណង់ ប្រតិបត្តិការក្នុងរើលំនៅឋាន និងសំណង់ផ្សេងៗចេញពីតំបន់រមណីយដ្ឋានអង្គរនិងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរាប៉ះពាល់ដល់ភូមិគោលដៅ ១១៤ភូមិ ក្នុងឃុំចំនួន ១៧ សង្កាត់ចំនួន ៧ ក្រុងចំនួន១ និងស្រុកចំនួន ៤៕

Related Topics:សម្ដេចតេជោ ហ៊ុន សែន