ព័ត៌មានជាតិ

ណែនាំឲ្យស្គាល់ស្រ្តីទីមួយ កាន់តំណែងជាឧបនាយករដ្ឋមន្រ្តី

បានផុស

២ years មុន

នៅ

ថ្ងៃអង្គារ ២៥ តុលា ២០២២

ដោយ

លោកជំទាវកិត្តិសង្គហបណ្ឌិត ម៉ែន សំអន ជាអ្នកនយោបាយខ្មែរនិងជាស្រ្តីទីមួយដែលទទួលបានឋានៈជាឧបនាយករដ្ឋមន្ត្រី។ ជាមេដឹកនាំស្រ្តីដ៏ឆ្នើមមួយរូប លោកជំទាវជាឥស្សរជនជាន់ខ្ពស់ក្នុងជួរគណបក្សប្រជាជនកម្ពុជា ហើយក្នុងចំណោមស្រ្តីថ្នាក់ដឹកនាំ ៣ រូបកំពុងដឹកនាំក្រសួង ក្នុងតួនាទីជារដ្ឋមន្រ្តីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កុមារភាព

លោកជំទាវ ម៉ែន សំអន កើតនៅថ្ងៃ ១៥ សីហា ឆ្នាំ ១៩៥៣ នៅឃុំសំបួរ ស្រុកសំបូរ ខេត្តក្រចេះ។

ក្រុមគ្រួសារ

ស្វាមីរបស់លោកជំទាវគឺលោក ប៉េង ប៉ាត់ អតីតសមាជិកព្រឹទ្ធសភាមកពីគណបក្សប្រជាជនកម្ពុជា និងជាសមាជិកគណៈកម្មការមហាផ្ទៃ ការពារជាតិ ទំនាក់ទំនងរដ្ឋសភា ព្រឹទ្ធសភា អធិការកិច្ចនិងមុខងារសាធារណៈ។

លោកជំទាវមានកូនប្រុសពីរនាក់ កំពុងកាន់តំណែងខ្ពង់ខ្ពស់ក្នុងជួររដ្ឋាភិបាល គឺលោក ប៉េង ពោធិ៍សា ដែលទើបទទួលបានការតែងតាំងជាអភិបាលរងខេត្តស្វាយរៀង និងលោក ប៉េង ពោធិ៍នា កំពុងកាន់តួនាទីជារដ្ឋលេខាធិការក្រសួងសាធារណការនិងដឹកជញ្ជូន។

លោក ប៉េង ពោធិ៍សា (រូបខាងឆ្វេង) និងលោក ប៉េង ពោធិ៍នា (រូបកណ្តាល) និងអភិបាលខេត្តតាកែវ លោក អ៊ូច ភា (រូបខាងស្តាំ)

កម្រិតវប្បធម៌

លោកជំទាវ ទទួលបានសញ្ញាប័ត្រអក្សរសាស្ត្រខ្មែរកម្រិតឧត្តមសិក្សានៅឆ្នាំ ១៩៩២ និងទទួលបានបណ្ឌិតកិត្តិយសទស្សនវិជ្ជា ផ្នែកវិទ្យាសាស្រ្តនយោយបាយនៅឆ្នាំ ២០០៦។

ប្រវត្តិការងារ

លោកជំទាវបានចូលបម្រើកងទ័ពនៅឆ្នាំ ១៩៧០ ដោយចាប់ផ្តើមអាជីពជាគិលានុបដ្ឋាយិកាយោធា។ នៅឆ្នាំ១៩៨៦ ចូលជាសមាជិកមជ្ឈឹមបក្សប្រជាជនបដិវត្តកម្ពុជា។ នៅឆ្នាំ១៩៩៨ បានក្លាយជាសមាជិកគណៈកម្មការអចិន្ត្រៃយ៍នៃរដ្ឋសភា និងជាប្រធានគណៈកម្មការសុខភាពសាធារណៈ សង្គម និងកិច្ចការនារី។

ក្នុងឆ្នាំ ២០០៣ លោកជំទាវបានជាប់ជាតំណាងរាស្រ្តមណ្ឌលខេត្តស្វាយរៀងរបស់គណបក្សប្រជាជនកម្ពុជា។ នៅឆ្នាំ២០០៤ ទទួលបានការតែងតាំងជារដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច។

នៅឆ្នាំ ២០១៩ ប្រមុខរដ្ឋាភិបាលបានផ្តល់ភារកិច្ចបន្ថែមដល់លោកជំទាវទទួលបន្ទុកជួយនាយករដ្ឋមន្រ្តី លើការងារអធិការកិច្ចនិងសវនកម្ម ព្រមទាំងជួយនាយករដ្ឋមន្រ្តីលើការងារសង្គម។

នៅក្នុងអង្គសន្និបាតគណៈកម្មាធិការកណ្ដាលលើកទី ៤៣ អាណត្តិទី៥ របស់គណបក្សប្រជាជនកម្ពុជា កាលពីថ្ងៃ ២៤ ខែធ្នូ ឆ្នាំ ២០២១ បានសម្រេចបោះឆ្នោតជ្រើសតាំងលោកជំទាវជាអនុប្រធានគណបក្សគណបក្សប្រជាជនជកម្ពុជា ដែលធ្វើឲ្យចំនួនអនុប្រធានគណបក្សដែលកំពុងដឹកនាំរដ្ឋាភិបាលកើនឡើងដល់ទៅ ៤ រូប គឺមានសម្តេច ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ សម្តេច សាយ ឈុំ ប្រធានព្រឹទ្ធសភា និងសម្តេច ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ។

ក្រៅពីតំណែងក្នុងជួររដ្ឋាភិបាល និងក្នុងគណបក្ស លោកជំទាវកិត្តិសង្គហបណ្ឌិត ម៉ែន សំអន ក៏ជាប្រធានសមាគមនារីកម្ពុជាដើម្បីសន្តិភាពនិងអភិវឌ្ឍន៏ផងដែរ។

ឡើងតំណែងឧត្តមសេនីយ៍ផ្កាយមាស ៤

លោកជំទាវ ម៉ែន សំអន ជានាយទាហានជាន់ខ្ពស់នៃកងយោធពលខេមរភូមិន្ទ ក្រសួងការពារជាតិមានឋានន្តរស័ក្តិឧត្តមសេនីយ៍ឯក ( ផ្កាយ៣ )។ នៅថ្ងៃទី០៦ ខែកញ្ញា ឆ្នាំ២០០៨ ទទួលបានការដំឡើងឋានន្តរស័ក្តិថ្នាក់នាយឧត្តមសេនីយ៍ផ្កាយមាស ៤។