ពលរដ្ឋងឿងឆ្ងល់ការសាងសង់​ផ្លូវច្រាំងទន្លេ​បាសាក់​មានភាពយឺតយ៉ាវ

ប្រជាពលរដ្ឋរស់នៅក្នុងមូលដ្ឋានខណ្ឌច្បារអំពៅ​ រាជធានីភ្នំពេញ​កំពុងមានការងឿងឆ្ងល់​ចំពោះសកម្មភាព​សាងសង់ផ្លូវច្រាំងទន្លេបាសាក់ក្នុងមូលដ្ឋានខណ្ឌច្បារអំពៅហាក់ដូចជាយឺតយ៉ាវ។​

​តាមប្រភពពីលោក វ៉ាន់ ប៊ុនធឿន រស់នៅសង្កាត់និរោធបាននិយាយថា​ ការសាងសង់ផ្លូវច្រាំង​ទន្លេ​តភ្ជាប់ពីគល់ស្ពានព្រះមុនីវង្សចាស់ក្នុងសង្កាត់ច្បារអំពៅទី២ រហូតដល់តំបន់កោះនរា ស្ថិតក្នុងសង្កាត់​និរោធហាក់ដូចជាមានការយឺតយ៉ាវ។​

ប៉ុន្តែអ្វីដែលបងប្អូនប្រជាពលរដ្ឋមានការងឿងឆ្ងល់​នោះគឺអ្នក​មានដីធ្លីជាប់មាត់ទន្លេដែលស្ថិតក្នុងតំបន់ដែលត្រូវសាងសង់ផ្លូវបែជានាំគ្នាបង្កើតជាហាងលក់ដូរ និងសំណង់ផ្សេងៗហាក់ដូចជាគឃ្លើននឹងការកំណត់របស់អាជ្ញាធរ។

បើតាមប្រសាសន៍របស់លោក យ៉ិន វុធ ចៅសង្កាត់ច្បារអំពៅទី២​បានប្រាប់កម្ពុជាថ្មីតាម​រយៈ​ទូរស័ព្ទនាព្រឹកថ្ងៃទី២៦ខែតុលានេះថា ការចាប់ផ្តើមសាងសង់ផ្លូវជាប់ដងទន្លេបាសាក់ ​(ច្រាំងទន្លេ) ​នេះគឺនៅអំឡុងឆ្នាំ២០២០ដោយកំណត់ទទឹងផ្លូវ៧ម៉ែត្រដោយបានដាំបង្គោលកំណត់ទីតាំងសាងសង់រួចរាល់ហើយដែរ។

ហើយផ្លូវនេះបើសិនជាសាងសង់រួចរាល់តាមគំរោងមែននោះគឺច្បាស់ជាកាត់បន្ថយការកកស្ទះ ពិសេសអ្នកធ្វើដំណើដោយម៉ូតូនឹងកង់ជាដើម៕

អត្ថបទ៖ នរា