អាជ្ញាធរ បំភ្លឺករណីចុះធ្វើកិច្ចសន្យាជាមួយម្ចាស់ទីតាំងបាល់ទះមួយកន្លែង ដែលសង្ស័យថា ភ្នាល់ប្រាក់រហូតជិត ១ពាន់ដុល្លារ

រដ្ឋបាលស្រុកសាមគ្គីមានជ័យ បានចេញលិខិតបំភ្លឺមួយ ពាក់ព័ន្ធករណីចុះត្រួតពិនិត្យ និងធ្វើកិច្ចសន្យាជាមួយម្ចាស់ទីតាំងបាល់ទះមួយកន្លែង ដែលប្រជាពលរដ្ឋរាយការណ៍ថា មានការភ្នាល់ដាក់ប្រាក់រហូតដល់ជិត ១ពាន់ដុល្លារ។

ការចេញលិខិតបំភ្លឺនេះ បន្ទាប់ពីមានគណនីហ្វេសប៊ុកឈ្មោះ Bun Thorn Lay និងអ្នកលេងហ្វេសប៊ុកមួយចំនួនទៀត បានបង្ហោះសារថា «កុំចេះតែហ៊ាន ស្រុកខ្ញុំអញ្ចឹង តារាងបាល់ទះក៏ចាប់ដែរ អរគុណបងបងដែលអនុវត្តច្បាប់»។

តាមរយៈលិខិតបំភ្លឺរបស់ខ្លួន នៅព្រឹកថ្ងៃទី ២៧ ខែតុលានេះ រដ្ឋបាលស្រុកសាមគ្គីមានជ័យ បានឲ្យដឹងថា នៅថ្ងៃទី ២៦ ខែតុលា ឆ្នាំ ២០២២ វេលាម៉ោង ១១ និង៣៦នាទីព្រឹក គណៈបញ្ជាការឯកភាពរដ្ឋបាលស្រុក បានទទួលដំណឹងពីប្រជាពលរដ្ឋថា កន្លែងលេងបាល់ទះមួយកន្លែង នៅទីតាំងនោះមានការភ្នាល់ដាក់ប្រាក់រហូតដល់ជិត ១ពាន់ដុល្លារ។

នៅពេលចុះទៅដល់ទីតាំង គណៈបញ្ជាការឯកភាពស្រុក បានចុះធ្វើកិច្ចសន្យា និងណែនាំអប់រំដល់ម្ចាស់តារាងបាល់ទះ ឈ្មោះ កែវ ណាវី ដែលរស់នៅភូមិមានកកើត ឃុំត្បែងខ្ពស់ ស្រុកសាមគ្គីមានជ័យ ខេត្តកំពង់ឆ្នាំង ឲ្យឈប់មានការភ្នាក់ចំពោះកីឡា ដែលលេងដើម្បីសុខភាព។

យ៉ាងណាក៏ដោយ គណៈបញ្ជាការឯកភាពស្រុក មិនមានការហាមឃាត់នោះទេ មានតែលើកស្ទួយដល់វិស័យកីឡាបន្ថែមទៀត៕