អាងកំពីងពួយធ្លាប់​ល្បីនៅបាត់ដំបង ប្រែជាស្ងាត់ជ្រងំ

សំណល់នៃរបបខ្មែរក្រហម និងធ្លាប់ជាប់ឈ្មោះបោះសម្លេងថាជារមណីយដ្ឋានដ៏ល្បីល្បាញមួយក្នុងទឹកដីខេត្តបាត់ដំបងគឺ “អាងកំពីងពួយ” ប្រែជា​មាន​​ភាព​ស្ងាត់ជ្រងំ គ្មានភ្ញៀវទេសចរណ៍ទៅកម្សាន្តទៀតទេ។

ក្រោយពីមានការរុះរើទីតាំងលក់ដូរនៅតាមដងទំនប់ បច្ចុប្បន្នតំបន់ទេសចរណ៏ដ៍ល្បីមួយនេះមានតែអ្នកលក់ដូរកំប៉ិកកំប៉ុក គ្រាន់បំរើសេវាម្ហូបអាហារបន្តិចបន្តួចដល់អ្នកដំណើរឆ្លងកាត់ម្ដងម្កាលតែប៉ុណ្ណោះ។

មន្រ្តីទេសចរណ៍​ខេត្ត​បាត់ដំបង​បាន​ឲ្យ​ដឹង​ថា បច្ចុប្បន្នរមណីយដ្ឋានអាងកំពីងពួយនេះ ត្រូវ​​គេផាត់ចេញពីក្នុងបញ្ជីគោលដៅទេសចរណ៏ ដោយស្ថិតក្រោមការគ្រប់គ្រងទាំងស្រុងរបស់ក្រសួងធនធាន​ទឹកវិញ។

លោក ហម អារុណ ប្រធានការិយាល័យឧស្សាហកម្ម ទេសចរណ៍ខេត្តបាត់ដំបង​បាន​ឲ្យ​កម្ពុជា​ថ្មី​ដឹង​ថា វាជាតំបន់ឆ្លងកាត់តែប៉ុណ្ណោះ ហើយខាងមន្ទីរធនធានទឹកកំពុងបន្តការរៀបចំជាថ្មី។

កម្ពុជា​ថ្មី មិនទាន់មានការឆ្លើយតបពីមន្ទីរជំនាញនៅឡើយតើតំបន់នេះត្រូវបានរៀបចំឡើងវិញសម្រាប់ទាញកំណើនទេសចរវិញដែរឬយ៉ាងណា។

អត្ថបទ៖ សៅ សារិទ្ធ