សម្ដេចតេជោ ៖ បើគ្មានរដ្ឋប្រហារទម្លាក់ សម្តេចព្រះ នរោត្តម សីហនុ ទេនោះ មិនដឹងថា កម្ពុជា រីកចម្រើនដល់ណាទេ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា លើកឡើងថា នៅឆ្នាំ ១៩៧០ ប្រសិនបើមិនមានការធ្វើរដ្ឋប្រហារ​ទម្លាក់ ព្រះបាទ សម្តេចព្រះ នរោត្តម សីហនុ ទេនោះ មិនដឹងថា ប្រទេសកម្ពុជា រីកចម្រើនដល់ណាទេ។

សម្ដេចតេជោ ហ៊ុន សែន បានថ្លែងក្នុងពិធីបើកការដ្ឋានស្តារ និងលើកកម្រិតគុណភាពជាតិលេខ ៣១ និងលេខ ៣៣ នាព្រឹកថ្ងៃទី ៣០ ខែធ្នូនេះថា កាលពីថ្ងៃម្សិលមិញនេះ គឺជាខួបលើកទី ២៤ឆ្នាំ នៃការបញ្ចប់សង្រ្គាមនៅកម្ពុជា ក្រោមនយោបាយឈ្នះ-ឈ្នះ ដែលនាំមកនូវសន្តិភាព និងការឯកភាពទឹកដីជាលើកដំបូង ក្នុងប្រវត្តិសាស្រ្ដរាប់រយឆ្នាំរបស់កម្ពុជា។

សម្ដេចតេជោ ហ៊ុន សែន​ លើកឡើងថា ប្រសិនបើគ្មានរដ្ឋប្រហារទម្លាក់ ព្រះបាទ សម្តេចព្រះ នរោត្តម សីហនុ ទេនោះ មិនដឹងថា ប្រទេសកម្ពុជា មានការរីកចម្រើនបែបណានោះទេ។ សម្ដេចតេជោ ហ៊ុន សែន បានថ្លែងយ៉ាងដូច្នេះថា «ប្រសិនបើពុំមានរដ្ឋប្រហារឆ្នាំ ១៩៧០ ហើយទុកឲ្យសម្ដេច ព្រះនរោត្តម សីហនុ ព្រះអង្គដឹកនាំបន្តទៀត មិនដឹងថា ប្រទេសកម្ពុជា រីកចម្រើនដល់ណាទេ»។

ប៉ុន្តែជាអកុសលប្រទេសកម្ពុជា ដែលបានទទួលការកសាងក្នុងមួយរយៈប្រមាណជិតពីរស្សវត្សន៍កន្លងមក ត្រូវបានបំផ្លិតបំផ្លាញដោយសារសង្រ្គាម។ សម្ដេចតេជោ ហ៊ុន សែន បានបន្ថែមថា «ចឹងប្រសិនបើគ្មានរដ្ឋប្រហារ ១៨ មីនា ១៩៧០ ទេ វាក៏មិននាំមកនូវសង្រ្គាមនេះដែរ ពេលសង្រ្គាមបានផ្ទុះឡើងនៅឆ្នាំ​ ១៩៧០ ខ្ញុំទើបមានអាយុ ១៨ឆ្នាំទេ ខ្ញុំមិនមែនជាអ្នកទទួលខុសត្រូវ ទៅលើការបង្កើតសង្រ្គាមនេះឡើយ ក៏ប៉ុន្តែខ្ញុំក៏អត់នឹកគិតថា អំរែកចំណងដែលជំនាន់មុន ​បានចង បង្កឡើង ដូចជា ពួកលន់ ណុល សិរីមតៈ ចេង ហេង ត្រូវបានអ្នកជំនាន់ក្រោយជាអ្នកស្រាយទៅវិញ»។

សម្ដេចតេជោ ហ៊ុន សែន លើកឡើងទៀតថា ទោះបីជាអ្នកជំនាន់មុន ឬអ្នកជំនាន់ក្រោយ បង្កើតបញ្ហាក៏ដោយ តែវាជាកាតព្វកិច្ចរបស់កូនខ្មែរទាំងអស់​ ដែលត្រូវរំលត់សង្រ្គាម៕

អត្ថបទ៖ ឃួន សុភ័ក្រ