ភ្ញៀវទេសចរជាង ២លាននាក់ចេញកម្សាន្តនៅទូទាំងប្រទេស​ថ្ងៃឆ្លងឆ្នាំសកល

ថ្ងៃឆ្លងឆ្នាំសកល ២០២២ ឆ្លងចូល ២០២៣ (៣១ ខែធ្នូ ឆ្នាំ២០២២ ឆ្លងចូលថ្ងៃ១ ខែមករា ឆ្នាំ២០២៣) នៅទូទាំងប្រទេសទទួលបានភ្ញៀវសរុបប្រមាណ២,០២២,៩២០នាក់ ក្នុងនោះភ្ញៀវជាតិ២,០០៦,១១៧នាក់ និងភ្ញៀវបរទេស១៦,៨០៣នាក់។ នេះបើតាមការលើកឡើងរបស់លោក ថោង ខុន រដ្ឋមន្រ្តីក្រសួងទេសចរណ៍។

ចំពោះគោលដៅទេសចរណ៍សំខាន់ៗមួយចំនួន ដែលទាក់ទាញភ្ញៀវទេសចរច្រើនជាងគេ រួមមាន៖ គោលដៅរាជធានីភ្នំពេញ ទទួលបានភ្ញៀវទេសចរចំនួន ៤៥៥,៨៣២នាក់, ខេត្តព្រះសីហនុ ៣៣៨,៥៥២នាក់, ខេត្តសៀមរាប ៣៣៧,៧៦៩នាក់,  ខេត្តកំពត ៣៣០,៦៥៩នាក់,ខេត្តបាត់ដំបង ១៥៨,១១០នាក់, ខេត្តកែប ៨៨,៣៥៦នាក់,  ខេត្តត្បូងឃ្មុំ ៨៤,៦៨៣នាក់ និងខេត្តកំពង់ចាម ៧៦,៩០១នាក់ ជាដើម។

បើតាមលោក ថោង ខុន បានឱ្យដឹងថា តួលេខខាងលើមានការកើនឡើង ៧៦.៦៥% ធៀបនឹងពិធីឆ្លងឆ្នាំសកល​ឆ្នាំ២០២២។

កំណើនភ្ញៀវទេសចរនេះ ដោយសាររដ្ឋបាលរាជធានីខេត្ត ក្រុង ស្រុកនានា បានរៀបចំជាពិធីអបអរសាទពិធីឆ្លងឆ្នាំ ការប្រគុំតន្រ្តី ការតុបតែងលម្អក្រុង ដាក់ភ្លើងបំភ្លឺ ការរៀបចំពិធីរាប់ថយក្រោយ (Countdown) បាញ់កាំជ្រួចអបអរ​សាទរ និងការបង្ហោះគោមជាដើម ដែលជាការទាក់ទាញភ្ញៀវទេសចរ មានការកើនឡើងជាខ្លាំង៕