សម្ដេចតេជោ ហ៊ុន សែន៖ ​ជ័យជម្នះ ៧ មករា ផ្ដល់កំណើតទី២ឱ្យប្រជាជន បើគ្មាន ៧ មករា កម្ពុជាគ្មានថ្ងៃនេះទេ

សម្ដេចតេជោ ហ៊ុន សែន នាយករដ្ឋមន្ត្រីកម្ពុជាមានប្រសាសន៍ថា ថ្ងៃ​ជ័យជម្នះ ៧ មករា ឆ្នាំ ១៩៧៩ គឺបានផ្ដល់កំណើតទី២ឱ្យប្រជាជនកម្ពុជា ហើយបើគ្មានជ័យជម្នះ ៧ មករា គឺគ្មានកម្ពុជានៅថ្ងៃនេះទេ។

សម្ដេចតេជោ ហ៊ុន សែន មានប្រសាសន៍នៅក្នុងពិធីអបអរសាទរថ្ងៃជ័យជម្នះ ៧ មករា ខួបលើកទី៤៤ឆ្នាំ នៅថ្ងៃទី ៧ មករា ឆ្នាំ ២០២៣ នៅមជ្ឈមណ្ឌលកោះពេជ្រថា ជ័យជម្នះ៧មករា បានបញ្ចប់សក្ករាជដ៍ខ្មៅងងឹត និងបើកឡើងនូវសក្ករាជថ្មីរបស់កម្ពុជាគឺឯករាជ្យ សេរីភាព ប្រជាធិបតេយ្យ និងវឌ្ឍនភាពសង្គម​ដែលបានសង្គ្រោះអាយុជីវិតប្រជាជនរាប់លាននាក់ពីគ្រោះមរណៈ និងបាននាំមកវិញនូវសិទ្ធិសេរីភាពគ្រប់យ៉ាង​ដែលបាត់បង់ទាំងស្រុង​ក្នុងរបប ប៉ុល ពត ជាពិសេសសិទ្ធិនៃការរស់រានមានជីវិត។

សម្ដេចតេជោ ហ៊ុន សែនថ្លែងថា៖ «ជ័យជម្នះ ៧ មករា បានផ្ដល់កំណើតទី២ឱ្យប្រជាជនកម្ពុជា បើគ្មានជ័យ​ជម្នះ ៧ មករា គឺគ្មានកម្ពុជានៅថ្ងៃនេះទេ នេះជាសច្ចៈធម៌ប្រវត្តិសាស្ត្រ ដែលគ្មានជនណា ឬកម្លាំង​ណាអាចបំភ្លៃ និងបំផ្លាញបានឡើយ គឺមានតែអ្នកស្រលាញ់របប​ប្រល័យពូជសាសន៍ប៉ុណ្ណោះ​ដែល​ប្រឆាំងនិងជ័យជ័យជម្នះ ៧ មករា»។

គួររំលឹកដែរថា កាលពី៤៤មុន ប្រជាពលរដ្ឋខ្មែរគ្រប់រូប រួមទាំងកុមារតូចៗត្រូវរស់នៅក្រោមការបង្ខិតបង្ខំអោយធ្វើការលើសកម្លាំង គ្មានថ្ងៃឈប់សម្រាក អាហារមិនគ្រប់គ្រាន់ គ្មានមន្ទីរពេទ្យ គ្មានសាលារៀន គ្មានវត្តអារាម ហើយសិទ្ធិសេរីភាពទាំងអស់របស់ពលរដ្ឋមិនមានឡើយ។

ប៉ុន្តែក្រោយពីប្រទេសជាតិត្រូវបានរំដោះ នៅថ្ងៃទី៧ ខែមករា ឆ្នាំ១៩៧៩ ក្រោមការដឹកនាំរបស់គណបក្សប្រជាជនកម្ពុជា ប្រជាពលរដ្ឋមានសិទ្ធិសេរីភាពពេញលេញឡើងវិញ ហើយប្រទេសជាតិទាំងមូលមានសុខសន្តិភាព និងការអភិវឌ្ឍន៍រីកចម្រើនគ្រប់វិស័យមកទល់សព្វថ្ងៃនេះ ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន ជានាយករដ្ឋមន្រ្តី និងជាប្រធានគណបក្សប្រជាជនកម្ពុជា៕

អត្ថបទ៖ ឡេង ដេត