ភ្នំពេញ៖ តារាចម្រៀងវ័យក្មេងលោក លីម តិចម៉េងបន្ទាប់ពីក្លាយជាម្ចាស់ពានបច្ចុប្បន្នត្រូវបានគេកត់ សម្គាល់ឃើញថា ទាំងប្រជាប្រិយភាព និងសម្ទុះនៃការគាំទ្រពីទស្សនិកជនគឺមានការកើនឡើងជាបន្តបន្ទាប់។ ពិសេសគឺតាមរយ:​ការឡើងច្រៀងលើឆាកម្តងៗមានអ្នកទៅគាំទ្រភ្លូកទឹកភ្លូកដីតែម្តង។

យ៉ាងណាមិញនាពេលកន្លងមកតារាចម្រៀងមានដើមកំណើតមកពីទឹកដីខេត្តកំពងចាមរូបនេះ ក៏ធ្លាប់បានទម្លាយពី​ប្រវត្តិតស៊ូខ្លះៗមកហើយដោយកាលនោះ តិចម៉េង បានឲ្យដឹងថា ខ្លួនធ្លាប់ជាអតីតក្មេងឃ្វាលគោតែ លីម តិចម៉េង មិនបាននិយាយអ្វីច្រើនជាងនេះទេ។ថ្វីត្បិតលោកមិនបានបង្ហាញអ្វីច្រើនជាងនេះតែកំលោះតូច លីម តិចម៉េង នៅតែស្ថិតក្នុងការគាំទ្រសម្រាប់បេះដូងមហាជននិងយុវវ័យ។

ដោយឡែកងាកមកចាប់អារម្មណ៍កាលពីថ្ងៃទី០៨ ខែមករាឆ្នាំ២០២៣ ស្រាប់តែតារាចម្រៀងវ័យក្មេង លីម តិចម៉េង បានបង្ហោះរូបថតអតីតកាលរបស់ខ្លួនចំនួន១សន្លឹក ដោយភ្ជាប់នូវប្រវត្តិរបស់ខ្លួនធ្លាប់ជាក្មេងរត់តុតាមរោងការ និងជាសន្តិសុខ​រហូតមានឱកាសក្លាយជាអ្នកចម្រៀងពេលនេះ។

តារាចម្រៀងលោក លីម តិចម៉េង រៀបរាប់ឲ្យមហាជនដឹងដូច្នេះថា«អ្នករត់តុតាមរោងការ សន្តិសុខ…គ្រប់ យ៉ាងត្រូវបាន​ផ្លាស់ប្តូរដោយការតស៊ូការបង្កើតកម្មវិធីប្រឡងនឹងការជ្រើសរើសរបស់បងប្អូនមហាជននៅទូទាំងប្រទេសសូមឱ្យរឿងល្អៗក្តីសុខមានគ្រប់ក្រុមគ្រួសាររបស់បងប្អូនខ្មែរទាំងអស់គ្នា»។ តាមរយ:សារនេះ ក៏មានអ្នកគាំទ្រជាច្រើនបានគាំ​ទ្រការតស៊ូ​របស់លោកផងដែរ៕ ចាន់រ៉ា