លោក ម៉ៅ ធនិន អភិបាលខេត្តកំពត នៅថ្ងៃទី១៦ ខែមករា ឆ្នាំ២០២៣នេះ បានដឹកនាំមន្ត្រីរាជការ កងកម្លាំងប្រដាប់អាវុធ អាជ្ញាធរ និងអ្នកពាក់ព័ន្ធក្រោមឱវាទ បានចុះសួរសុខទុក្ខ និងសំណេះសំណាលជាមួយប្រជាពលរដ្ឋដល់ខ្នងផ្ទះ នៅក្នុងស្រុកទឹកឈូ ខេត្តកំពត។

លោក ម៉ៅ ធនិន បានដឹកនាំមន្ត្រីរាជការចុះធ្វើសកម្មភាពនេះ ក្នុងគោលបំណងឱ្យបានដឹង ពីសុខទុក្ខ ការជួបការលំបាក ឬបញ្ហានៅក្នុងជីវភាពរស់នៅប្រចាំថ្ងៃ របស់ប្រជាពលរដ្ឋ ដើម្បីអាចជួយដោះស្រាយ និងរួមសុខរួមទុក្ខក្នុងលក្ខណៈជាគ្រួសារតែមួយជាមួយប្រជាពលរដ្ឋ។

លោក ម៉ៅ ធនិន បានលើកឡើងថា លោកធ្វើដំណើរមកនេះ ក្នុងនាមជាកូន ជាប្អូន ជាបង ជាពូ ឬជាអ៊ុំ នៅក្នុងគ្រួសារតែមួយជាមួយប្រជាពលរដ្ឋគ្រប់រូប គ្រប់ក្រុមគ្រួសារ មិនមែនមកក្នុងឋានៈជាអភិបាលខេត្តនោះឡើយ។

លោក ម៉ៅ ធនិន បានបន្តថា អ្វីដែលជាបញ្ហាកង្វល់ ជាបញ្ហាប្រឈម ជាបញ្ហាដែលប្រជាពលរដ្ឋដោះស្រាយមិនចេញ ឬក៏មានការថ្នាំងថ្នាក់អំពីអ្វីមួយ ឬប្រជាពលរដ្ឋបានរងនូវការងារដែលគិតថាមិនល្អចំពោះគ្រួសារ អាចរៀបរាប់ប្រាប់មកកាន់លោកបាន ដើម្បីលោកបានចូលរួមរំលែកដោះស្រាយ រួមទាំងសុខទាំងទុក្ខជាមួយនឹងប្រជាពលរដ្ឋ៕

អត្ថបទ៖ សឹង រ៉ាត់