អ្នកនាំពាក្យបក្សប្រជាជន៖ ៥ឆ្នាំខាងមុខ តម្រូវការធនធានជំនាញ​ក្នុងវិស័យកសិកម្ម​នឹងមានទីផ្សារខ្ពស់

គណបក្សប្រជាជនកម្ពុជា មានគោលនយោបាយអភិវឌ្ឍសេដ្ឋកិច្ចសង្គមច្បាស់លាស់ ជាពិសេសលើវិស័យកសិកម្ម។

លោក សួស យ៉ារ៉ា អ្នកនាំពាក្យគណបក្សប្រជាជនកម្ពុជា បានលើកឡើងថា ផលប្រយោជន៍កសិកម្ម ដែលនឹងទទួលបាននារយៈពេល ៥ឆ្នាំទៀត គឺរាជរដ្ឋាភិបាល មានគោលនយោបាយ​អភិវឌ្ឍ​សេដ្ឋកិច្ច​សង្គមច្បាស់លាស់។

ថ្លែងនៅក្នុងសន្និសីទសារព័ត៌មានរបស់គណបក្សប្រជាជនកម្ពុជា ស្តីពីលទ្ធផល នៃមហាសន្និបាតវិសាមញ្ញតំណាង​ទូទាំងប្រទេស កាលពីថ្ងៃទី ២៩ ខែ មករា ឆ្នាំ ២០២២ លោក សួស យ៉ារ៉ា បានគូសបញ្ជាក់ថា គណបក្សប្រជាជន ចង់ពញ្ញាក់ស្មារតីដល់យុវជន ដែលជាធនធានមនុស្សស្ថិតក្នុងជំនាញកសិកម្មឱ្យរីករាយចំពោះការទទួលបាន​ផលប្រយោជន៍ពីការសិក្សារបស់ខ្លួន។

លោកបន្ថែមដូច្នេះថា« អ្វីដែលយើងជំរុញនោះ គឺប្រទេសកម្ពុជា ជាប្រទេសកសិកម្ម ដើម្បីធានាសន្តិសុខស្បៀង និងការផ្គត់ផ្គង់គ្រប់គ្រាន់ រដ្ឋត្រូវធានាឱ្យមានសន្តិសុខទីផ្សារ។ ដូច្នេះ ទាំងសន្តិសុខទីផ្សារ ទាំងការផលិតកសិកម្ម ត្រូវធ្វើទៅតាមគោលដៅភូមិសាស្រ្ត។ ទន្ទឹមនឹងនេះ យើងត្រូវការធនធានមនុស្សយ៉ាងច្រើន ទាំងផ្នែកប្រពលវប្បកម្ម ផ្នែកវារីវប្បកម្ម និងវិស្វករកសិកម្ម​ជាដើម»។

មន្រ្តីជាន់ខ្ពស់រូបនេះ បាននិយាយថា គណបក្សប្រជាជន ដែលមានសម្តេចតេជោ ហ៊ុន សែន ជាថ្នាក់ដឹក​នាំកំពូល បានដាក់ចេញគោលនយោបាយកសាងកម្ពុជា ពីប្រទេសកសិកម្ម ទៅជាប្រទេសកសិ​-ពាណិជ្ជកម្ម។ បើតាមលោក សួស យ៉ារ៉ា ពាក្យថា កសិ-ពាណិជ្ជកម្មនេះ មានន័យថា ធនធានមនុស្សទាំងអស់នឹងត្រូវ​ប្រើទៅតាម​ជំនាញ តាមភូមិសាស្រ្តរបស់ខ្លួន បម្រើដល់ប្រជាជនតាមតំបន់នីមួយៗ ដើម្បីផលិតផ្គត់ផ្គង់ទីផ្សារ ដែលមានតម្រូវការពិត​ប្រាកដ។ លោកសង្កត់ធ្ងន់ថា« កន្លងមក មុនយើងផលិតគ្រាន់តែសម្រាប់ហូបខ្លួនឯងទេ តែឥឡូវនេះ យើងនឹងផលិតដើម្បីនាំចេញ»។

ជាមួយគ្នានេះ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានលើកឡើងដែរថា ក្នុងគោលនយោបាយ​របស់គណបក្សពីឆ្នាំ ២០២៣ ដល់ឆ្នាំ ២០២៨ នឹងមានការជំរុញបន្ថែមលើគ្រប់វិស័យទាំងអស់ ពិសេសលើផ្នែកកសិកម្ម​។ លោកថា ផ្នែក​កសិកម្មនេះ កម្ពុជា មានរាប់ពាន់ឆ្នាំមកហើយ។ ប៉ុន្តែវិស័យនេះ នៅតែជួបបញ្ហាចោទ ដែលរាជ​រដ្ឋាភិបាល ក្រោមការដឹក​នាំរបស់​គណបក្សប្រជាជនត្រូវតែដោះស្រាយ។ លោកបន្តដូច្នេះថា« យើងខិត​ខំដើម្បីកែ​លម្អជីវភាព​រស់​នៅរបស់ប្រជាកសិករ​យើង ដែលមានចំនួនរហូតដល់ ៨០ភាគរយ ដែលយើងកត់សម្គាល់ថា មានតួនាទីសំខាន់ក្នុងដំណើរសេដ្ឋកិច្ច​សង្គមរបស់យើង។ ដូច្នេះហើយទើបយើងផ្តោតសំខាន់ទៅលើ កសិករ ដើម្បីកែច្នៃផលិតផលរបស់យើង កុំនៅ​អភិរក្សនិយម​ច្រើនឆ្នាំតទៅទៀត»។

លោក សុខ ឥសាន បានបន្ថែមទៀតថា រដ្ឋាភិបាល បានខិតខំបណ្តុះបណ្តាអ្នកបច្ចេកទេសទៅតាមភូមិឃុំ ឱ្យគ្រប់នៅទូទាំងប្រទេស ដើម្បីណែនាំពន្យល់កសិករ អំពីបច្ចេកទេសដាំដុះ ចិញ្ចឹមសត្វ ចិញ្ចឹមត្រី ធ្វើយ៉ាងណា​ឱ្យផលិតផលកើតចេញពីវិស័យកសិកម្មនេះ មានលក្ខណៈជាស្តង់ដារអន្តរជាតិ ទើបអាចនាំចេញ​ទៅក្រៅ​ប្រទេសបាន។ នេះជាទស្សនវិស័យរបស់គណបក្សប្រជាជន ដែលជាកិច្ចសន្យានយោបាយរបស់រាជរដ្ឋាភិបាល ក្នុងនីតិ​កាលទី៧​នៃរដ្ឋសភាខាងមុខនេះ។ លោក ឥសាន បាន​សង្កត់ធ្ងន់ថា ពេលឈ្នះឆ្នោតអណត្តិថ្មីនេះ រាជរដ្ឋាភិបាល នឹងចាប់ផ្តើ​ម​អនុវត្តបន្ទាន់ភ្លាមៗលើកិច្ចការងារនេះ។

រាជរដ្ឋាភិបាល បាននិងកំពុងគិតគូរបង្កើតសមាគមកសិករ ដើម្បីចៀសវាងឈ្មួញបន្ទាបថ្លៃផលិតផលកសិកម្ម និងដើម្បីធ្វើយ៉ាងណាឱ្យមានតុល្យភាពជាមួយឈ្មួញ។ ហើយរដ្ឋបានត្រៀមថវិកាបម្រុងសម្រាប់ទិញកសិផល​របស់កសិករ កុំឱ្យឈ្មួយឆ្លៀតឱកាសបន្ទាបថ្លៃផងដែរ។ នេះគឺជាការគាំពាំរបស់រាជរដ្ឋាភិបាល ដែលបានដាក់​ចេញនូវផែនការអនុវត្តនាពេលឆាប់ៗខាមុខនេះ៕ នេះជាការគូសបញ្ជាក់របស់លោក សុខ ឥសាន៕