ឯកឧត្ដមបណ្ឌិត ហ៊ុ​ន ម៉ាណែត ស្នើឲ្យដាក់ជាកាតព្វកិច្ចសម្រាប់សាលាអន្តរជាតិនានា ត្រូវមានកម្មវិធីសិក្សាភាសាខ្មែរ

ឯកឧត្ដមបណ្ឌិត ហ៊ុ​ន ម៉ាណែត បេក្ខភាពនាយករដ្ឋមន្ត្រីបន្តវេនរបស់គណបក្សប្រជាជនកម្ពុជា បានស្នើឲ្យរដ្ឋមន្ត្រីក្រសួងអប់រំ យុវជន និងកីឡា ពិចា​រណាចំពោះសាលាឯកជនអន្តរជាតិនានា ត្រូវដាក់ជាកាតព្វកិច្ចនូវកម្មវិធីសិក្សារបស់ពួគេ ឲ្យមានបង្រៀនភាសាខ្មែរដាច់ខាត។

ការស្នើរបស់ឯកឧត្ដមបណ្ឌិត ហ៊ុន ម៉ាណែត បានធ្វើឡើងក្នុងពិធី​ប្រកាស​សមាសភាពក្រុមប្រឹក្សាភិបាលអាណត្តិថ្មី និងប្រគល់បណ្ណសរសើរគ្រូឆ្នើមប្រចាំឆ្នាំ ២០២២ ដល់លោកគ្រូ-អ្នកគ្រូ បុគ្គលិកអប់រំ នៃសហព័ន្ធសេវាអប់រំនៅកម្ពុជា កាល ពីថ្ងៃទី ១២ ខែកុម្ភៈ ឆ្នាំ ២០២៣។

នៅក្នុងឱកាសនោះ ឯកឧត្ដមបណ្ឌិត ហ៊ុន ម៉ាណែត បានស្នើឲ្យក្រសួងអប់រំ យុវជ​ន និងកីឡា ពិចា​រណាចំពោះសាលាឯកជនអន្តរជាតិនានា ត្រូវដាក់ជាកាតព្វកិច្ចនូវកម្មវិធីសិក្សារបស់ពួគេ ឲ្យមានបង្រៀ​នភាសាខ្មែរដាច់ខាត ខណៈលោកសង្កេតឃើញថា កូនខ្មែររៀននៅសាលាឯកជនអន្តរជាតិមួយចំនួន មិនចេះភាសាខ្មែរ។

ឯកឧត្ដមបណ្ឌិត មានប្រសាសន៍បែបនេះថា «ខ្ញុំសុំឲ្យក្រសួងពិចារណា ព្រោះឥឡូវសាលាអន្តរជាតិខ្លះ គឺកូនខ្មែរ អត់ចេះខ្មែរទេ តែស្រុកខ្មែរ ​ជា Official Language ខ្មែរ ចឹងខ្ញុំសុំឲ្យបង មិនដឹងថា អាចលូកយ៉ាងណា ទៅក្នុងសាលាឯក ជនបរទេស ដែលគាត់ដាក់…និយាយរួមឲ្យគាត់តែដាក់តែម្ដង…ចឹងគួរតែជាកាតព្វកិច្ចសាលា ទោះបីជាសាលាបរទេស សាលាអាមេរិក សាលាអង់គ្លេសក៏ដោយ ត្រូវដាក់ Curriculum ហ្នឹង កូនខ្មែរ ត្រូវរៀនភាសាខ្មែរ»។

បន្ថែមពីលើនេះ ឯកឧត្ដមបណ្ឌិត ហ៊ុ​ន ម៉ាណែត ក៏បានស្នើបន្ថែមឲ្យដាក់បញ្ចូល ទាំងចំណេះដឹងទូទៅ វប្បធម៌ ប្រពៃណីខ្មែរ និងសីលធម៌ នៅក្នុងកម្មវិធីសិក្សាភាសាខ្មែរនោះផងដែរ។

ឯកឧត្ដមបណ្ឌិត ហ៊ុ​ន ម៉ាណែត លើកឡើងបែបនេះថា «បើអាចបាន នៅក្នុងម៉ោងខ្មែរនេះ បញ្ចូលទាំងចំណេះដឹងទូទៅ និងភាសា បូកជាមួយវប្បធម៌ ប្រពៃណីយើង សីលធម៌ ព្រោះកូនខ្មែរខ្លះ ខ្ញុំឥឡូវ ខ្ញុំមិនថាទេ ប៉ុន្តែមិត្តភក្ដិប្រពន្ធខ្ញុំរអ៊ូ ខ្ញុំធ្លាប់តែឃើញកូនអាមេរិកាំង កូនខ្មែរកើតនៅអាមេរិកាំង ជេរឲ្យឪវា ស្ដីឲ្យវា ពេលឪវាបញ្ចេមតិខុសពីវា វាថា You Stupid You Are អញ្ចេះៗ ប៉ុន្តែម៉ោងនេះនៅស្រុកខ្មែរ មានហើយ កូនខ្មែរដែលបណ្ដុះបណ្ដាលនៅស្រុកខ្មែរ មានបញ្ចេមតិបែបនេះឲ្យឪពុក-ម្ដាយ ទៅមិនបានទេ»។

ឯកឧត្ដមបណ្ឌិត លើកឡើងទៀតថា សិទ្ធិមនុស្សជារឿងមួយ តែក៏ត្រូវមានការគោរពវប្បធម៌ ប្រពៃណីមួយឲ្យបានច្បាស់លាស់ដែរ ហើយក៏ត្រូវចេះគោរពចាស់ទុំ មានសីលធម៌ល្អ និងត្រូវចេះដឹងគុណ ដែ​លនេះសុទ្ធសឹងស្ថិតនៅក្នុងជំនាញទន់របស់មនុស្ស។

ឯកឧត្ដមបណ្ឌិត ហ៊ុ​ន ម៉ាណែត បន្ថែមបែបនេះទៀតថា «បើមនុស្សមានតែចំណេះដឹង តែបាត់អត្តសញ្ញាណ បាត់វប្បធម៌ក្នុងខ្លួន បាត់តម្លៃក្នុងខ្លួនជាខ្មែរ តើយើងធ្វើអី? ក្មេងខ្មែរ ជាកូនខ្មែរ រៀនភាសាអាមេរិកាំង និយាយដូចអាមេរិកាំង ចង់រៀនសាលាអាមេរិកក៏ដោយ នៅតែជាកូនខ្មែរ ចង់ទៅនៅស្រុកអាមេរិកាំង ក៏គេសួរអ្នក​​ឯងមកពីណាដែរ ប្រាកដជាខ្មែរហើយ។

ដូច្នេះ ដើម្បីកុំឲ្យកូនខ្មែរ អត់ចេះភាសាខ្មែរ នៅលើទឹកដីខ្មែរ ភ្លេចវប្បធម៌ សីលធម៌ខ្មែរនោះ ឯកឧត្ដមបណ្ឌិត ហ៊ុ​ន ម៉ាណែត បានស្នើដល់លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ពិចារណាចំពោះករណីនេះ៕