សម្ដេចតេជោ ផ្ដល់អនុសាសន៍ឲ្យបង្កើតស្នាដៃសិល្បៈថ្មីៗ ដោយយកចិត្តទុកដាក់ចំពោះមុខមាត់ និងអត្តសញ្ញាណជាតិ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានផ្ដល់អនុសាសន៍ឲ្យបង្កើតស្នាដៃសិល្បៈថ្មីៗ ដែលមានភាពច្នៃប្រឌិត ដោយយកចិត្តទុកដាក់ចំពោះមុខមាត់ និងអត្តសញ្ញាណជាតិ។

នៅក្នុងពិធីអបអរសាទរទិវាវប្បធម៌ជាតិ ៣មីនា លើកទី ២៥ និងពិសាអាហារសាមគ្គីជាមួយសិល្បករ-សិល្បការិនីប្រមាណជាង ៤០០០នាក់ នៅល្ងាចថ្ងៃទី ២ ខែមីនានេះ សម្ដេចតេជោ ហ៊ុន សែន បានផ្ដល់អនុសាសន៍មួយចំនួនដល់ក្រសួងវប្បធម៌ និងវិចិត្រសិល្បៈ និងភាគីពាក់ព័ន្ធ ត្រូវយកចិត្តទុកដាក់ ដើម្បីជំរុញឲ្យវិស័យវប្បធម៌របស់កម្ពុជា កាន់តែមានភាពរីកចម្រើន។

សម្ដេចតេជោ ហ៊ុន សែន បានផ្ដល់អនុសាសន៍ឲ្យបង្កើនការអភិវឌ្ឍមូលធនមនុស្ស ក្នុងវិស័យវប្បធម៌ និងភាពម្ចាស់ការលើការងារអភិរក្ស លើកស្ទួយ និងអភិវឌ្ឍវប្បធម៌ ជាពិសេសការបង្កើតស្នាដៃសិល្បៈថ្មីៗ ដែលមានភាពច្នៃប្រឌិតដោយ យកចិត្តទុកដាក់ ចំពោះមុខមាត់ និងអត្តសញ្ញាណជាតិ ស្របទៅតាមបទដ្ឋានគិតយុត្តិ ក្រោមសីលធម៌ វិជ្ជាជីវៈ និងស្ដង់ ដារសកល ដើម្បីបង្កើនផលិតភាព និងសក្ដានុពល ក្នុងការប្រកួតប្រជែងជាមួយសិល្បៈវប្បធម៌ ក្នុងតំបន់ និងអន្តរជាតិ៕