ជំនាញសង្រ្គោះជីវិតលើផ្ទៃសមុទ្រផ្តល់ការការពារភ្ញៀវទេសចរ​ជំរុញកំណើនសេដ្ឋកិច្ចកម្ពុជា

ឆ្នាំសមុទ្រនៅខេត្តព្រះសីហនុចំនួន ៣០នាក់ បានចូលរួមវគ្គបណ្តុះបណ្តាលពិសេសស្តីពីការជួយសង្គ្រោះជីវិត​លើផ្ទៃសមុទ្រ ដើម្បីពង្រឹងសុវត្ថិភាពភ្ញៀវទេសចរ នៅតំបន់សមុទ្រខេត្តព្រះសីហនុ កាលពីថ្ងៃទី ១៣ មីនា។

លោក ឈើតគៀត អាថាកន ឯកអគ្គរាជទូតនៃព្រះរាជាណាចក្រថៃប្រចាំកម្ពុជា និងលោក ម៉ាង ស៊ីណេត អភិបាលរងខេត្តព្រះសីហនុ បានអញ្ជើញចូលរួមក្នុងវគ្គបណ្តុះបណ្តាលខ្លីនេះ។

លោក ឈើតគៀត អាថាកន បានលើកឡើងថា ការបើកវគ្គបណ្តុះបណ្តាលជួយសង្គ្រោះអាយុជីវិត​ជនរងគ្រោះខាង​ផ្លូវទឹក ឬ Water Rescue ជូនដល់សិក្ខាកាមក្នុងខេត្តព្រះសីហនុនេះគឺដើម្បីអភិវឌ្ឍន៍សិក្ខាកាម​ក្នុងខេត្តជួយ​សង្គ្រោះអាយុជីវិតជនរងគ្រោះខាងផ្លូវទឹក។

វគ្គបណ្តុះបណ្តាលនេះមានសារសំខាន់យ៉ាងខ្លាំងចំពោះការអភិវឌ្ឍសេដ្ឋកិច្ចនៅថ្នាក់ខេត្តនិងការពង្រឹងនូវសក្តានុភាពធនធានមនុស្សរបស់ខេត្តនៅក្នុងការផ្តល់សេវាកម្មទេសចរសុវត្ថិភាព និងជួយកាត់បន្ថយគ្រោះថ្នាក់និងការបាត់បង់ជីវិត​ដែលកើតឡើងចំពោះភ្ញៀវទេសចរជាតិ និងបរទេសជាច្រើន នៅក្នុងមួយឆ្នាំៗ ដែលជាការជំរុញនូវវិស័យទេសចរណ៍​ខេត្តជាប់មាត់សមុទ្រ ស្របតាមគោលនយោបាយរបស់កម្ពុជា និងថៃក្រោមតម្រោង Two Kingdoms One Destination នឹងជាការជួយជំរុញការត្រៀមខ្លួនរបស់ខេត្តព្រះសីហនុ នៅក្នុងនាមជាខេត្តទទួល​ធ្វើម្ចាស់ផ្ទះ​កីឡាវិញ្ញាសាលើទឹកស៊ីហ្គេមឆ្នាំ២០២៣ នេះផងដែរ។

លោក ម៉ាង ស៊ីណេត អភិបាលរងខេត្តបានលើកឡើងថា វគ្គបណ្តុះបណ្តាល «ស្ដីពីការសង្គ្រោះជីវិតលើផ្ទៃសមុទ្រ ដើម្បីពង្រឹងសុវត្ថិភាពភ្ញៀវទេសចរនៅខេត្តព្រះសីហនុ» ដែលនឹងប្រព្រឹត្តទៅចាប់ពីថ្ងៃទី១៣ ដល់ថ្ងៃទី១៧ ខែមីនា ឆ្នាំ២០២៣។ លោកមសង្ឃឹមថា វគ្គបណ្តុះបណ្តាលនេះ នឹងជួយជំរុញឱ្យកិច្ចសហប្រតិបត្តិការ ចំណងមិត្តភាព និងសាមគ្គីភាព រវាងប្រទេសទាំងពីរ កាន់តែមានភាពជិតស្និទ្ធ និងស៊ីជម្រៅថែមមួយកម្រិតទៀត។ ទន្ទឹមនេះ វគ្គបណ្តុះ​បណ្តាលនេះ នឹងជួយពង្រឹង និងអភិវឌ្ឍន៍សមត្ថភាពដល់មន្ត្រីឆ្មាំឆ្នេរសមុទ្រខេត្តព្រះសីហនុ ឱ្យកាន់តែមាន​សមត្ថភាព​ខ្លាំង ក្នុងការអនុវត្តភារកិច្ចរបស់ខ្លួន ដើម្បីចូលរួមជួយសង្គ្រោះ អាយុជីវិតមនុស្ស សត្វ ពិសេសក្នុងការត្រៀម​បង្ការនូវរាល់​ឧបទ្ទវហេតុនានា ដែលអាចកើតមានឡើង នៅលើផ្ទសមុទ្រ។

បច្ចុប្បន្នខេត្តព្រះសីហនុ មានឆ្មាំសមុទ្រដែលទទួលស្គាល់ជាផ្លូវមានចំនួន ១៨នាក់ បាននិងកំពុងប្រចាំការ​នៅតាម​គោលដៅដូចជា៖ ឆ្នេរឯករាជ្យ ឆ្នេរអូរឈើទាល និងឆ្នេរអូរត្រេះ ជាដើម។ ដោយឡែកឆ្មាំឆ្នេរសមុទ្រ​ដែលបានចូល​រួមក្នុងវគ្គបណ្តុះបណ្តាលនេះ មានចំនួន ៣០នាក់ ដែលរួមមានបុគ្គលិកឆ្មាំឆ្នេរពីបណ្តាលក្រុមហ៊ុនឯកជន ផ្សេងៗទៀត៕