លោកស្រី ជា សិរី  ៖ ផ្នត់គំនិតពលរដ្ឋគឺជាឧបសគ្គធំ​នាំឱ្យការប្រើប្រាស់ប្រាក់រៀល​នៅកម្ពុជាមានកំណើនយឺត

លោកស្រីបណ្ឌិត ជា សិរី  ទេសាភិបាលរងធនាគារជាតិកម្ពុជាបានមានប្រសាសន៍ថា ផ្នត់គំនិតរបស់ប្រជាពលរដ្ឋ គឺជាឧបសគ្គដ៏ធំបំផុតដែលនាំឱ្យការប្រើប្រាស់ប្រាក់រៀលនៅប្រទេសកម្ពុជា មានកំណើនយឺត ទាមទារឱ្យមានការចូលរួមពីគ្រប់មជ្ឈដ្ឋានពិសេសសាធារណៈជន។

ថ្លែងក្នុងទិវាអបអរសាទរប្រាក់រៀលខួបលើកទី៤៣ នៃការដាក់ឲ្យចរាចរប្រាក់រៀលឡើងវិញ ២០ មីនា ១៩៨០ – ២០ មីនា ២០២៣ នៅថ្ងៃទី១៩មីនានេះ នៅផ្សារទំនើបអ៊ីអនម៉លមានជ័យ (អ៊ីអន៣) រាជធានីភ្នំពេញ លោកស្រីបណ្ឌិត បានបន្តថា បច្ចុប្បន្នការប្រើប្រាស់ប្រាក់រៀលនៅកម្ពុជាបានកើនឡើងជាមុន តែក្នុងកម្រិតមួយមិនច្រើនទេ ព្រោះថាឧបសគ្គធំនៃការប្រើប្រាស់ប្រាក់រៀលគឺផ្នត់គំនិតរបស់ប្រជាពលរដ្ឋ។

លោកស្រីបណ្ឌិត បានពន្យល់ថា ជាធម្មតានៅស្រុកគេនៅពេលណារូបិយវត្ថុមិនមានស្ថេរភាព គេនឹងងាកមកប្រើប្រាស់​ប្រាក់សន្សំរូបិបណ្ណបរទេសវិញ ដែលផ្ទុយពីស្រុកខ្មែរយើងអត្រាប្តូរប្រាក់រក្សាបានយ៉ាងខ្លាំង បើទោះបីជាក្នុង​បរិបទកូវីដ១៩ ក៏ដោយដែលកាលណោះរូបិយវត្ថុប្រទេសមួយចំនួនបានធ្លាក់ថ្លៃធៀបជាមួយប្រាក់ដុល្លារអាមេរិក ប៉ុន្តែលុយរៀលយើងបានរក្សាស្ថេរភាពល្អ។

លោក ស្រីបណ្ឌិត បានបន្តទៀតថា ដោយសារតែផ្នត់គំនិតរបស់ប្រជាពលរដ្ឋគិតថា ប្រាក់ដុល្លារស្រួលចាយ​ជាងប្រាក់រៀលព្រោះថា លុយរៀលមានលេខសូន្យច្រើនពិបាកគិត។

យ៉ាងណាក៏ដោយ លោកស្រីបណ្ឌិត បានបន្ថែមថា មានហាងមួយចំនួនបានចាប់ផ្តល់ដាក់​តម្លៃជាប្រាក់ដុល្លារផង​និងប្រាក់រៀលផង ហើយមានហាងខ្លះដាក់បិទតម្លៃជាប្រាក់រៀលតែម្តង​ដែលទាំងនេះនឹងជួយជំរុញ​ការប្រើប្រាស់​ប្រាក់រៀលកាន់តែច្រើន។

បើតាមលោកស្រី ជា សិរី «យើងទទួលបានជោគជ័យដែលអាចរក្សាសមាមាត្រនៃការប្រើប្រាស់​ប្រាក់រៀលបានកើន​ជាងមុនព្រោះថាកន្លងមកមានការព្រួយបារម្ភថា កាលណាសេដ្ឋកិច្ចកាន់តែធំប្រជាពលរដ្ឋងាក​ទៅប្រើប្រាស់ប្រាក់ដុល្លារ​កាន់តែខ្លាំងដែរ។ ប៉ុន្តែយើងអាចរក្សាសមាមាត្របានដូចមុនហើយថែមទាំងអាចបង្កើន​សមាមាត្រប្រាក់រៀលធៀប​ជាមួយដុល្លារច្រើនជាងមុនបន្តិច។ ដូចនេះទាមទារឱ្យមានការចូលរួមពីគ្រប់មជ្ឈដ្ឋានពាក់ព័ន្ធពិសេសសាធារ​ជន​និងយុវជនតែម្តង»៕

អត្ថបទ៖ សំអឿន