មន្រ្តីជាន់ខ្ពស់ពាណិជ្ជកម្ម លើកទឹកចិត្តវិនិយោគិនអាមេរិក​មកបណ្តាក់ទុន​នៅកម្ពុជា

មន្រ្តីជាន់ខ្ពស់ក្រសួងពាណិជ្ជកម្ម បានលើកទឹកចិត្តក្រុមហ៊ុនសហរដ្ឋអាមេរិក ដែលមានបំណងមក​បណ្តាក់ទុនវិនិយោគ​នៅកម្ពុជា ក៏ដូចជាការសហការវិនិយោគជាមួយដៃគូក្នុងស្រុក ដើម្បីអភិវឌ្ឍន៍សេដ្ឋកិច្ច​កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក បួន សារៈមុនី រដ្ឋលេខាធិការក្រសួងពាណិជ្ជកម្ម បានសម្តែងនូវសុទិដ្ឋិនិយមចំពោះទំហំពាណិជ្ជកម្មរវាងកម្ពុជា និងសហរដ្ឋអាមេរិក ដែលមានការកើនឡើងគួរឱ្យកត់សម្គាល់ បើទោះជាមានវិបត្តិកូវីដយ៉ាងណាក៏ដោយ។ លោក លើកឡើងបែបនេះ នៅក្នុងជំនួបពិភាក្សាជាមួយលោក ហួត គីមឆា អគ្គកុងស៊ុលកិត្តិយសកម្ពុជា ប្រចាំទីក្រុងឡុងប៊ិច រដ្ឋកាលីហ្វ័រញ៉ា សហរដ្ឋអាមេរិក កាលពីថ្ងៃទី ២១ មីនា។

លោក ហួត គីមឆា បានថ្លែងកោតសរសើរពីកិត្យានុភាពកម្ពុជា ពិសេសផលិតផលកសិកម្ម ដូចជា ផលិតផលអង្ករ​កម្ពុជា ដែលទទួលបានចំណាត់ថ្នាក់លេខ១ ក្នុងរយៈពេល៥ឆ្នាំជាប់គ្នា។

នាជំនួបនេះដែរ តំណាងក្រុមហ៊ុន Singpoli Group សហរដ្ឋអាមេរិកក៏បានធ្វើបទបង្ហាញជូន លោករដ្ឋលេខាធិការ អំពីប្រតិបត្តិការ, ផលិតផលរបស់ក្រុមហ៊ុន និងពានរង្វាន់ដែលក្រុមហ៊ុនទទួលបាន និងជាពិសេសនោះគឺ បានបង្ហាញ​ពីការចាប់អារម្មណ៍ខ្ពស់ ក្នុងការចាប់យកឱកាសវិនិយោគនៅកម្ពុជា។

គណៈប្រតិភូវិនិយោគិនសហរដ្ឋអាមេរិក បានថ្លែងអំណរគុណដល់ក្រសួងពាណិជ្ជកម្ម ដែលតែងតែយកចិត្តទុកដាក់ និងផ្ដល់កិច្ចសហប្រតិបត្តិការដល់គណៈប្រតិភូរបស់លោកនៅកម្ពុជាគ្រប់ពេលវេលា។

ពាក់ព័ន្ធនឹងវិស័យវិនិយោគនេះ សម្តេចតេជោ ហ៊ុន សែន សង្កត់ធ្ងន់ថា អាមេរិកជាក្បាលម៉ាស៊ីនសេដ្ឋកិច្ចពិភពលោក សូមកុំបន់ស្រន់ឱ្យអាមេរិកចុះខ្សោយឱ្យសោះ។ ដោយសម្តេចបញ្ជាក់ថា អាមេរិក និងអឺរ៉ុប គឺជាទីផ្សាររបស់យើង ព្រោះយើងនាំចេញទៅទីផ្សារអឺរ៉ុប និងអាមេរិកច្រើនណាស់។ សម្តេចថ្លែងបែបនេះ នៅក្នុងពិធីប្រគល់សញ្ញា​បត្រជូនដល់និស្សិតនៃវិទ្យាស្ថានវ៉ាន់ដា នាព្រឹកថ្ងៃទី ២២ មីនា ឆ្នាំ ២០២៣៕