ព័ត៌មានជាតិ

ខេត្តព្រះវិហារ ជាប់ជាខេត្តផលិតកសិផលសរីរាង្គច្រើនជាងគេនៅកម្ពុជា

បានផុស

៣ years មុន

នៅ

ថ្ងៃព្រហស្បតិ៍ ២៣ មីនា ២០២៣

ដោយ

ខេត្តព្រះវិហារមានវិសាលភាពផ្ទៃដីធំទូលាយ ហើយជាដែនដីប្រកបដោយជីវជាតិអំណោយផលសម្រាប់ការធ្វើកសិកម្ម។

លោក គីម រិទ្ធី អភិបាលនៃគណៈអភិបាលខេត្តព្រះវិហារបានបញ្ជាក់ថា ខេត្តព្រះវិហារដែលស្ថិតនៅនៅទិសឧត្តរមានសក្កានុពលលើការធ្វើកសិកម្មសរីរាង្គ។

លោកអះអាងថា ខេត្តព្រះវិហារជាប្រភពផ្គត់ផ្គង់កសិផលសរីរាង្គច្រើនជាងគេ ដែលផ្ទៃដីដាំដុះផ្តោតលើគុណភាព ដើម្បីនាំចេញទៅកាន់ទីផ្សារអន្តរជាតិ។

ខេត្តព្រះវិហារមានសហគមន៍កសិកម្មសរុបចំនួន ៤៣ សហគមន៍ ដែលត្រូវបានចុះបញ្ជីទទួលស្គាល់ដោយមន្ទីរកសិកម្ម រុក្ខាប្រមាញ់ និងនេសាទខេត្ត។ មុខរបរសំខាន់ៗរបស់សហគមន៍កសិកម្មផ្ដោតលើផលិតផលសរីរាង្គដូចជា ស្រូវសរីរាង្គ ដំឡូងមីសរីរាង្គ និងគ្រាប់ស្វាយចន្ទីសរីរាង្គ។

លោកអភិបាលខេត្តបានបញ្ជាក់ថា វិស័យកសិកម្មជាឆ្អឹងខ្នងសេដ្ឋកិច្ចសម្រាប់ប្រជាពលរដ្ឋប្រមាណជាង ៨០%។ រដ្ឋបាលខេត្តក៏នៅតែបន្តពង្រឹងការអនុវត្តកសិកម្មសរីរាង្គ និងជំរុញឲ្យប្រជាកសិករខិតខំបង្កបង្កើនផល ដើម្បីរក្សាកេរ្តិ៍ឈ្មោះជាខេត្តកសិកម្មសរីរាង្គនាំមុខក្នុងប្រទេស។

តាមរបាយការណ៍របស់មន្ទីរកសិកម្មខេត្តព្រះវិហារ នៅឆ្នាំ២០២២ ការដាំដុះដំណាំស្រូវរដូវវស្សាក្នុងខេត្តអនុវត្តបានចំនួន ៩៩,១២០ ហិកតា លើផែនការ ៩១,២០០ហិកតា ដែលផ្ទៃដីប្រមូលផលបាន ៩៤,០៦៣ហិកតា ស្មើនឹង ១០០% ទទួលបានបរិមាណផលចំនួន ២៨៣,៧៤៣តោន និងទិន្នផលមធ្យម ៣.០១៧តោន/ហិកតា។

ដោយឡែកចំពោះការបង្កបង្កើនផលដំណាំរួមផ្សំ ដំណាំកសិឧស្សាហកម្ម និងឈើហូបផ្លែសរុបចំនួន ៦៣,៤៣៤ហិកតា ស្មើនឹង ៩០.៨៧% នៃផែនការ ៦៩,៨០៥ហិកតា ក្នុងនោះដំណាំរួមផ្សំនិងសាកវប្បកម្ម អនុវត្តបាន ៧៩០ហិកតា ស្មើនឹង ៣៥.៣២% ដំណាសាកវប្បកម្ម និងដំណាំហូបផ្លែរយៈពេលវែងអនុវត្តបាន ៧,២០១ហិកតា ស្មើនឹង ៧២.៥៤%៕