តើកម្ពុជា ត្រូវត្រៀមខ្លួនបែបណា ដើម្បីទប់វិបត្តិសេដ្ឋកិច្ច​នៅពេលខាងមុខ?

វិបត្តិកូវីដ-១៩ កើតឡើងតាំងពីឆ្នាំ ២០២០ បន្ទាប់មកជម្លោះរវាងរុស្ស៊ី និងអ៊ុយក្រែង បានធ្វើឱ្យពិភពលោកជួបប្រទះ​វិបត្តិសេដ្ឋកិច្ចធ្ងន់ធ្ងរ ទាំងតំបន់អាស៊ី និងអឺរ៉ុប។ វិបត្តិទំាងអស់នេះ ក៏បានជះឥទ្ធិពលដល់កំណើនសេដ្ឋកិច្ចកម្ពុជាផងដែរ បើទោះជារាជរដ្ឋាភិបាល ប្រឹងប្រែងជំរុញឱ្យមានកំណើនបែបណាក្តី ក៏នៅតែមានដំណើរស្ទុះឡើងយឺត។

តើកម្ពុជា ត្រូវធ្វើដូចម្តេច ដើម្បីទប់ទល់នឹងវិបត្តិផ្សេងៗបន្តទៀត នាថ្ងៃខាងមុខ?

លោក គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានលើកឡើងថា ដើម្បីទប់ស្កាត់វិបត្តិនានា នៅពេលខាងមុខ គឺត្រូវបង្កើតប្រព្រឹត្តិកម្មទីផ្សារ។ លោកថា ចំណុចនេះ រាជរដ្ឋាភិបាល បានខិតខំធ្វើតាមរយៈ​កិច្ចព្រមព្រៀងកម្ពុជា កូរ៉េ, កម្ពុជា ចិន និងជាមួយបណ្តាប្រទេសផ្សេងៗទៀត។ លើសពីនេះទៀត កម្ពុជា បានចូលទៅក្នុងសហគមន៍អាសិប និងការនាំចេញនាំចូលរវាងកម្ពុជា ជាមួយអាស៊ានជាដើម។

ទាំងអស់នេះ គឺជាចក្ខុវិស័យមួយ ដែលរដ្ឋាភិបាលកំពុងធ្វើយ៉ាងត្រឹមត្រូវ ដើម្បីទប់វិបត្តិនាថ្ងៃអនាគត។ ជាមួយគ្នានេះ តម្រូវការកម្លាំងពលកម្ម របស់កម្ពុជា នៅមានកម្រិតនៅឡើយ។ ការបណ្តុះបណ្តាលវិជ្ជាជីវៈ ត្រូវតែជាកត្តាសំខាន់​សម្រាប់ជំរុញកំណើន ព្រោះកម្មករដែលមានជំនាញវិជ្ជាជីវៈច្បាស់លាស់ នឹងអាចជំរុញកម្លាំងផលិតកម្មទៅ​លើវិស័យ​ឧស្សាហកម្មដែលប្រើបច្ចេកវិទ្យា ឧស្សាហកម្មធន់មធ្យម ធន់ធ្ងន់បាន វានឹងអាចទាញឱ្យកម្ពុជា មានឱកាសទៅ​ជាប្រទេស​មានឧស្សាហកម្មលូតលាស់ និងផលិតសម្រាប់នាំចេញបានច្រើនផងដែរ។

លោកបណ្ឌិត បានបន្ថែមទៀតថា ការប្រតិបត្តិរបស់អ្នកនយោបាយនៅក្រៅស្រុក ដែលតែងនិយាយមិនល្អពីកម្ពុជា ធ្វើឱ្យប្រជាពលរដ្ឋមានការព្រួយបារម្ភ នាំឱ្យប៉ះពាល់ដល់ការអភិវឌ្ឍសេដ្ឋកិច្ចជាតិ។ លោកបណ្ឌិតលើកឡើងដូច្នេះថា « យើងឈប់ពាក់វ៉ែនតាខ្មែរ ហើយបើកភ្នែកមើលមេឃឱ្យច្បាស់ នោះទើបយើងមានសេចក្តីសង្ឃឹមនៅក្នុងការរកចំណូល..មានតែពលរដ្ឋខ្លួនឯងទេ ដែលត្រូវខំប្រឹងប្រែងស្វែងរកប្រាក់ចំណូល ជំរុញកំណើនសេដ្ឋកិច្ច»។

លោកបណ្ឌិត គី សេរីវឌ្ឍន៍ បានសង្កត់ធ្ងន់ថា នៅជុំវិញខ្លួនរបស់យើងសុទ្ធតែជាលុយ តើយើងចេះប្រមូល​លុយឱ្យចូល​ក្នុងផ្ទះឬអត់? ការប្រមូលលុយឱ្យចូលក្នុងផ្ទះ ទាល់តែយើងខិតខំប្រឹងប្រែង បើសិនជាយើងនៅតែមុខផ្ទះ លុយមិន​អាចចូលក្នុងផ្ទះបានទេ លុះត្រាតែយើងបើកទ្វារធ្វើសកម្មភាព ទើបលុយហូរចូលក្នុងផ្ទះ។ ការគេងយូរ ការកម្សាន្ត ការផឹកស៊ីសប្បាយនៅពេលរាត្រី ធ្វើឱ្យភ្លឺឡើងយើងមិនអាចមកធ្វើការកើត នោះហើយគឺជាកត្តា​ដែលធ្វើឱ្យប្រទេស​យើងប្រទេសយើងនៅតែក្រ។ នេះជាការទាញហេតុផល ដើម្បីឆ្លើយតបនឹងសំណួរ​ខាងលើរបស់លោកបណ្ឌិត គី សេរីវឌ្ឍន៍។

លោកបណ្ឌិត បានគូសបញ្ជាក់ទៀតថា ដើម្បីទទួលបានផ្លែផ្កាជួយដល់ប្រទេសជាតិ គឺយុវជនត្រូវរៀនជានិច្ច រៀនពីការ​ស្តាប់ រៀនពីសាលា រៀនគ្រប់បែបយ៉ាង និងគ្រប់ទីកន្លែង៕