ព័ត៌មានជាតិ

ចំណេញចម្ងាយផ្លូវជាង ២០ គីឡូម៉ែត្រ ផ្លូវ ៧១ សេ គ្រោងបញ្ចប់ស្ថាបនានៅដើមឆ្នាំ២០២៤

បានផុស

២ years មុន

នៅ

ថ្ងៃព្រហស្បតិ៍ ២០ មេសា ២០២៣

ដោយ

ផ្លូវជាតិលេខ ៧១ សេ សម្រេចការសាងសង់បានជាង ៧០ ភាគរយ ហើយគ្រោងបញ្ចប់នៅដើមឆ្នាំ ២០២៤។

លោក ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំបានលើកឡើងនៅក្នុងសន្និសីទជោគជ័យរបស់រដ្ឋបាលខេត្តត្បូងឃ្មុំនៅព្រឹកនេះថា ផ្លូវជាតិលេខ ៧១ សេ ដែលកំពុងដំណើរការសាងសង់សម្រេចបានជាង ៧០ ភាគរយ នៅពេលសាងសង់រួចរាល់នឹងសម្រួលការធ្វើដំណើរ និងចំណេញពេលវេលាច្រើនណាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«តាមរយៈផ្លូវជាតិលេខ ៧១ សេ នៅពេលធ្វើហើយ បើយើងធ្វើដំណើរពីស្ពានស្ទឹងត្រង់ក្រូចឆ្មារទៅបុរីរដ្ឋបាលខេត្តមានចម្ងាយតែជាង ៦៥ គីឡូម៉ែត្រ។ តែបើធ្វើដំណើរពីសួងឆ្លងកាត់ទៅរកាករ ៥ ទៅឈូក ទៅស្ទឹងត្រង់ក្រូចឆ្មារមានចម្ងាយដល់ជាង ៨៥ គីឡូម៉ែត្រ។ អីចឹងទេគឺចំណេញច្រើនណាស់តាមរយៈផ្លូវកំណាត់ផ្លូវនេះ»។

នៅខេត្តត្បូងឃ្មុំមានផ្លូវជាតិឆ្លងកាត់ជាច្រើនខ្សែដូចជាផ្លូវជាតិលេខ ៧ ផ្លូវជាតិលេខ ៨ ផ្លូវជាតិលេខ ១១ ផ្លូវជាតិលេខ ៧៣ ផ្លូវជាតិលេខ ៧២ និងផ្លូវជាតិលេខ ៧១ សេ ដែលកំពុងស្ថាបនា។

លោកអភិបាលខេត្តបានបន្តថា មន្ទីរអភិវឌ្ឍជនបទគ្រោងបន្តស្ថាបនាផ្លូវកៅស៊ូប្រវែង ២០៥ គីឡូម៉ែត្រក្នុងខេត្តត្បូងឃ្មុំ និងផ្លូវបេតុងប្រវែង ៣២ គីឡូម៉ែត្រ ខណៈផ្លូវដែលស្ថិតនៅក្រោមមន្ទីរសាធារណខេត្តមានប្រវែងជាង ២២៩ គីឡូម៉ែត្រ។

ផ្លូវជាតិលេខ៧១ សេ ដែលកំពុងសាងសង់មានប្រវែងជាង ១១៤ គីឡូម៉ែត្របែកចេញពីជាតិលេខ៧១ ក្នុងស្រុកចម្ការលើ កាត់ស្ពានស្ទឹងត្រង់ក្រូចឆ្មារ ទៅផ្លូវជាតិលេខ ៧៣ បន្តទៅតំបន់រដ្ឋបាលខេត្តត្បូងឃ្មុំ។ ផ្លូវនេះប្រើប្រាស់រយៈពេលសាងសង់ចំនួន ៤២ ខែ ដែលចំណាយថវិកាប្រមាណ ១២៩,៩៨ លានដុល្លារអាមេរិក ហើយគ្រោងដាក់ឲ្យប្រើប្រាស់នៅដើមឆ្នាំ ២០២៤៕