ខេត្តបាត់ដំបងបន្តរងគ្រោះដោយខ្យល់កន្ត្រាក់ខូចខាតផ្ទះយ៉ាងដំណំ

ខេត្តបាត់ដំបង ៖ លំនៅឋានរបស់ប្រជាពលរដ្ឋចំនួន១៣ខ្នង នៅក្នុងស្រុកចំនួន២ ត្រូវបានខ្យល់កន្ត្រាក់វាយបំផ្លាញ ខ្ទេចខ្ទីស្ទើរទាំងស្រុង ក្នុងថ្ងៃតែមួយ ក្រោយពីមានភ្លៀងធ្លាក់មួយមេរួចមក។

ករណីគ្រោះធម្មជាតិនេះបានកើតឡើង កាលពីថ្ងៃទី ២១ ខែមេសា ឆ្នាំ២០២៣ ដោយប៉ះពាល់ទៅលើឃុំចំនួន២ ក្នុងស្រុកសង្កែ គឺឃុំអូរដំបង១ និងឃុំអន្លង់វិល បណ្តាលឱ្យខូចខាតផ្ទះប្រជាពលរដ្ឋសរុបចំនួន ១២ ខ្នងផ្ទះ គឺក្នុងភូមិអូរស្រឡៅ ចំនួន ៧ ខ្នងផ្ទះ និងភូមិជំនិច ចំនួន ៥ ខ្នងផ្ទះ ។

ដោយឡែកនៅស្រុកមោងឫស្សី វេលាម៉ោង៣ និង ៣០នាទី រសៀល ក៏មានភ្លៀងមួយមេយ៉ាងធំ លាយឡំនិងខ្យល់ កន្រ្តាក់ បណ្តាលឲ្យផ្ទះប្រជាពលរដ្ឋមួយខ្នងបានធ្លាក់ពីលើជើងតាងខូចខាតទាំងស្រុង នៅត្រង់ចំណុច​ភូមិផ្អៀង ឃុំ​កកោះ​ ស្រុក​មោងឫស្សី​ ម្ចាស់ផ្ទះឈ្មោះហួត ហង់ភេទប្រុស អាយុ២៤ឆ្នាំ។ នៅក្នុងករណីខាងលើនេះ មិនមានការប៉ះ ពាល់ដល់មនុស្សឡើយ៕ អត្ថបទ ៖ សោ និយមរ័ត្ន