ព័ត៌មានជាតិ

សប្ដាហ៍ក្រោយ វគ្គអធិការកិច្ចបឋមជំនាន់ ៥ វគ្គទី ៣-៤ នឹងបើកការបណ្ដុះបណ្ដាលដល់មន្ត្រី ដើម្បីបានយល់បន្ថែមអំពីច្បាប់សកលនៅកម្ពុជា

បានផុស

២ years មុន

នៅ

ថ្ងៃសុក្រ ១២ ឧសភា ២០២៣

ដោយ

លោក ណុប ចាន់ណារិន្ទ រដ្ឋលេខាធិការ និងជាអ្នកនាំពាក្យក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានឲ្យដឹងថា នាថ្ងៃពុធ ទី ១៧ ខែឧសភា ឆ្នាំ ២០២៣ វិទ្យាស្ថានជាតិអធិការកិច្ច នឹងបើកវគ្គបឋមអធិការកិច្ចជំនាន់ ៥ វគ្គទី ៣-៤ ក្រោមអធិបតីភាព លោក ឆេង សារឿន រដ្ឋលេខាធិការប្រចាំការ ជាតំណាងសម្ដេចកិត្តិសង្គហបណ្ឌិត ម៉ែន សំឣន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច (ទ រ ព ឣ)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ណុប ចាន់ណារិន្ទ បានបញ្ជាក់ទៀតថា វគ្គបណ្ដុះបណ្ដាលបឋមនេះ មានរយៈពេល ២ សប្តាហ៍ មានសិក្ខាកាមជាមន្ត្រីមកពីមន្ទីររាជធានី-ខេត្ត មន្ត្រីនៅក្រសួង ទ រ ព ឣ ក្នុងនោះក៏មានមកពីអគ្គាធិការដ្ឋាន នៃបណ្ដាក្រសួង ស្ថាប័នចំនួន ១៨ សរុបចំនួន ៤៥ រូប។

អ្នកនាំពាក្យដដែល បានឲ្យដឹងទៀតថា វគ្គបណ្ដុះបណ្ដាលជំនាញវិជ្ជាជីវៈអធិការកិច្ចនេះ នឹងចាប់ផ្ដើមពីថ្ងៃទី ១៦ ដល់ ២៦ ខែឧសភា ឆ្នាំ ២០២៣ ក្រោមប្រធានបទមួយចំនួនរួមមាន ៖ ទស្សនៈទូទៅ នៃការងារអធិការកិច្ច, ប្រព័ន្ធច្បាប់សកល និងកម្ពុជា, ការប្រៀបធៀបស្ថាប័នអធិការកិច្ច ៤ នៅអាស៊ី, ស្ថាប័នអធិការកិច្ច និងមន្ត្រីអធិការកិច្ច, គណនេយ្យ-ហិរញ្ញវត្ថុ, ផែនការ របាយការណ៍ និងកំណត់ហេតុអធិការកិច្ច និងវិធីសាស្ត្រអធិការកិច្ច។

វគ្គនេះធ្វើបទឧទ្ទេសនាមដោយលោកបណ្ឌិត ចាប សុថារិទ្ធ រដ្ឋលេខាធិការក្រសួង, លោក សុត គឹមសាន អនុរដ្ឋលេខាធិការ, លោកបណ្ឌិត សោម បូរ៉ាន់ នាយកវិទ្យាស្ថានជាតិអធិការកិច្ច និងលោកសាស្ត្រាចារ្យ ថង សុខុម អ្នកជំនាញគណនេយ្យ-ហិរញ្ញវត្ថុផងដែរ៕

អត្ថបទ ៖ វិមាន

Related Topics:បណ្ដុះបណ្ដាល