​ព្រះមហាក្សត្រយាងបំពេញព្រះរាជទស្សនកិច្ចផ្លូវរដ្ឋនៅឥណ្ឌា​ ៣ ថ្ងៃ

ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជានៅព្រឹក​ថ្ងៃទី ២៩ ខែឧសភានេះបានយាងទៅបំពេញព្រះរាជទស្សនកិច្ចផ្លូវរដ្ឋ​នៅសាធារណ​រដ្ឋឥណ្ឌា។

​ព្រះរាជដំណើរបំពេញព្រះរាជទស្សនកិច្ចរបស់ព្រះករុណានៅប្រទេសឥណ្ឌានាពេលនេះ មានរយៈ​ពេល៣ថ្ងៃ ចាប់ពីថ្ងៃទី២៩ ដល់ថ្ងៃទី៣១ខែឧសភា ឆ្នាំ២០២៣ តបតាមការយាងរបស់​លោកស្រី ដ្រៅផាឌី មួរមូ (Droupadi Murmu) ប្រធានាធិបតីឥណ្ឌា។ ​ព្រះរាជដំណើរទស្សនកិច្ចរបស់ព្រះមហាក្សត្រខ្មែរនៅប្រទេសឥណ្ឌានាពេលនេះ ចំពេលដែល​ប្រទេស​ទាំងពីរ កំពុងអបអរសាទរខួបអនុស្សាវរីយ៍លើកទី៧០ នៃការបង្កើតទំនាក់​ទំនងការទូត។

​ក្នុងអំឡុងពេលនៃព្រះរាជទស្សនកិច្ចនេះ លោកស្រី ដ្រៅផាឌី មួរមូ ប្រធានាធិបតីឥណ្ឌា និងលោក ណារិនដ្រា ម៉ូឌី នឹងទទួលរៀបចំព្រះរាជពិធីសវនាការថ្វាយ ព្រះករុណា ព្រះបាទនរោត្តម សីហមុនី ដែលនឹងលើកកិច្ចសហប្រតិបត្តិការទ្វេភាគី និងពហុភាគី នៅក្នុងឱកាសនោះ។

ក្រសួងការបរទេស និងកិច្ចសហប្រតិបត្តិការអន្តរជាតិបានបញ្ជាក់ថា ព្រះរាជទស្សនកិច្ចផ្លូវរដ្ឋរបស់ព្រះមហាក្សត្រកម្ពុជា នៅឥណ្ឌាគឺជាព្រឹត្តិការណ៍ដ៍មានសារសំខាន់មួយក្នុងទំនាក់ទំនងដ៍យូរអង្វែងរវាងប្រទេសទាំងពីរ ព្រមទាំងរួមចំណែក​ក្នុងការធ្វើឱ្យកាន់តែស៊ីជម្រៅនូវចំណងមិត្តភាពដ៍ប្រសើរ និងកិច្ចសហប្រតិបត្តិការដ៍ជិតស្និទ្ធ​ដែលចាក់ឫសយ៉ាងជ្រៅក្នុងបេតិកភណ្ឌវប្បធម៌ សាសនា និងប្រវត្តិសាស្ត្ររួម ដើម្បីជាប្រយោជន៍ទៅវិញទៅមកសម្រាប់ប្រជាជនទាំងពីរ៕