ព័ត៌មានជាតិ

ថតជាប់សត្វព្រៃ ៣៤ ប្រភេទ នៅក្នុងរបៀងអភិរក្សជាប់ឧទ្យានជាតិវីរ:ជ័យ

បានផុស

៣ years មុន

នៅ

ថ្ងៃអង្គារ ៦ មិថុនា ២០២៣

ដោយ

សត្វព្រៃចំនួន ៣៤ ប្រភេទត្រូវបានថតបានដោយម៉ាស៊ីនថតស្វ័យប្រវត្តិ បង្ហាញវត្តមាននៅក្នុងតំបន់របៀងអភិរក្សជីវៈចម្រុះជាប់នឹងឧទ្យានជាតិវីរ:ជ័យក្នុងខេត្តរតនគិរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅលើទំព័រហ្វេសប៊ុក លោក នេត្រ ភក្ត្រា រដ្ឋលេខាធិការក្រសួងបរិស្ថានបានគូសបញ្ជាក់ឱ្យដឹងថា កាលពីខែមីនា ឆ្នាំ ២០២៣ កន្លងទៅ ក្រុមមន្ត្រីជំនាញមកពីអង្គការសត្វព្រៃ និងរុក្ខជាតិ និងក្រសួងបរិស្ថាន មន្ត្រីឧទ្យានុរក្សនៃមន្ទីរបរិស្ថានខេត្តរតនគិរី និងសហគមន៍មូលដ្ឋាន បានដាក់ពង្រាយម៉ាស៊ីនថតស្វ័យប្រវត្តិប្រមាណជា ២៧ គ្រឿងនៅក្នុងតំបន់របៀងអភិរក្សជីវចម្រុះ ដោយទុកថតនៅក្នុងព្រៃអស់រយៈពេល ០២ ខែ។

អ្វីដែលគួរឱ្យកត់សម្គាល់ ក្នុងរយៈពេល ០២ខែ កន្លងមក មានសត្វព្រៃចំនួន ៣៤ ប្រភេទត្រូវបានថតបានក្នុងនោះ មាន ០៨ ប្រភេទ ត្រូវបានកំណត់ជាប្រភេទរងការគំរាមកំហែង ក្នុងបញ្ជីក្រហមរបស់អង្គការសហភាពអន្តរជាតិដើម្បីការអភិរក្សធម្មជាតិ IUCN។ បន្ថែមនេះក៏មាន ០៥ ប្រភេទ ជាប្រភេទងាយរងគ្រោះ ០២ ប្រភេទជាប្រភេទកំពុងជិតផុតពូជ និងចំនួន ០១ ប្រភេទជិតផុតពូជបំផុត ហើយមាន ០២ប្រភេទជាប្រភេទជិតរងការគំរាមកំហែង។

របកគំហើញសំខាន់ៗ ដែលបានថតជាប់រូបភាពរួមមាន សត្វខ្លា ឃ្មុំធំ, សត្វកែះ, សត្វក្ងោក សត្វស្វាកន្ទុយស ជាដើម ហើយក៏ថតជាប់សត្វខ្លាភ្ញីថ្មកែវមួយក្បាលដែលឃើញមានកូនផងដែរ។

លោក នេត្រ ភក្ត្រា អះអាងថា លទ្ធផលដ៏គួរឱ្យរំភើបទាំងនេះនឹងត្រូវបានប្រើប្រាស់ដើម្បីជួយជាព័ត៌មានដល់ការពិភាក្សាជុំវិញការកំណត់ និងបែងចែក តំបន់គ្រប់គ្រងនៃឧទ្យានជាតិវីរៈជ័យ និងរបៀងអភិរក្សជីវចម្រុះ ក្នុងខែមិថុនាខាងមុខ ដើម្បីធានាថាសត្វព្រៃសំខាន់ៗទាំងអស់ត្រូវបានការពារ៕

ប្រភព៖ នេត្រ ភក្ត្រា