រាជរដ្ឋាភិបាល​មានគោលដៅដោះស្រាយ​បញ្ហាអត់ការងារធ្វើនៅក្នុងស្រុក​

​សម្ដេចតេជោ ហ៊ុន សែន នាយករដ្ឋមន្ត្រីកម្ពុជា មានប្រសាសន៍នៅព្រឹកថ្ងៃទី ១០ ខែមិថុនានេះថា រាជរដ្ឋាភិបាលកម្ពុជា ​មាន​គោលដៅ ដោះស្រាយបញ្ហាអត់ការងារធ្វើនៅក្នុងស្រុក ខណៈរដ្ឋកំពុងជំរុញឱ្យ​មាន​ការវិនិយោគ​មកពីក្រៅប្រទេសដើម្បីបង្កើនទំនិញសម្រាប់ការនាំចេញ​។

​សម្ដេចតេជោ ហ៊ុន សែន ថ្លែងនៅក្នុងពិធី​ជួបសំណេះសំណាលជាមួយកម្មករនិយោជិតនៅរោងចក្រ លីន វេន ជី សាន់បូ អេនធើប្រាយ នៅស្រុកកណ្ដាលស្ទឹង ខេត្តកណ្ដាលថា៖ «អ្វីជាគោលដៅគឺដោះស្រាយការងារធ្វើនៅក្នុងចំណោមប្រជាជនយើង ក្មួយៗមួយចំនួនមានទាំងកូន ដែលដល់អាយុធ្វើការ មិនទាន់មានការងារធ្វើ ដូច្នេះត្រូវការវិនិយោគ​បន្ថែម ដែលយើងត្រូវកសាងផ្លូវថ្នល់ឱ្យបានល្អ ត្រូវកសាងកំពង់ផែ ព្រលានយន្តហោះ ការផ្គត់ផ្គង់​អគ្គិសនី និងទឹកឱ្យបានគ្រប់គ្រាន់»។

​សម្ដេចតេជោ ហ៊ុន សែនបញ្ជាក់ថា ការបំពេញតម្រូវការខាងលើដើម្បីទាក់ទាញការវិនិយោគ ខណៈបច្ចុប្បន្នជាសម័យនៃការប្រកួតប្រជែង ដែលយើងត្រូវមានលក្ខណៈសម្បត្តិល្អសម្រាប់​ការវិនិយោគ នោះអន្តរជាតិនឹងសម្លឹងមកកម្ពុជា៕