អ្នកនាំពាក្យ៖ អគាររដ្ឋបាលសាលាខេត្តព្រះសីហនុថ្មីសង់បានប្រមាណ៩៥ភាគរយហើយ

លោក ឃាង ភារម្យ អ្នកនាំពាក្យសាលាខេត្តព្រះសីហនុ បានមានប្រសាសន៍នៅថ្ងៃទី១៧មិថុនានេះថា រហូតមកដល់ពេលនេះអគាររដ្ឋបាលសាលាខេត្តព្រះសីហនុថ្មីសម្រេចការសាងសង់បានប្រមាណ៩៥ភាគរយហើយ បន្ទាប់ពីបានបញ្ចុះបឋមសិលាសាងសង់ជាផ្លូវការកាលពីដើមខែមីនា ឆ្នាំ២០២២កន្លងទៅ។

ថ្លែងប្រាប់ កម្ពុជាថ្មី នៅព្រឹកថ្ងៃទ១៧មិថុនានេះ លោក ឃាង ភារម្យ បានបន្តថា «ការងារStructure បាន៩៥ភាគរយហើយ នៅសល់ដំបូល ការងារបន្តគឺរៀបបូកជញ្ជាំងក្នុង ក្រៅ និងMEP»។ យ៉ាងណាក៏ដោយអគាររដ្ឋបាលថ្មីនេះមិនទាន់កំណត់ការសាងសង់រួចរាល់នៅពេលណានោះទេ។ លោក ឃាង ភារម្យ បានបញ្ជាក់ថា បញ្ហានេះរដ្ឋបាលខេត្តកំពុងសិក្សាលើលទ្ធភាពថវិកា។

បើតាមលោក គួច ចំរើន អភិបាលនៃគណៈអភិបាលខេត្តព្រះសីហនុ ធ្លាប់បានលើកឡើងថា អគាររដ្ឋបាលសាលាខេត្តព្រះសីហនុថ្មីបានបញ្ចុះបឋមសិលាសាងសង់នៅថ្ងៃទី០៧ ខែមីនា ឆ្នាំ២០២២ នៅលើទីតាំងចាស់ មានផ្ទៃក្រឡាសរុប ៤៤,០៩៣ម៉ែត្រការ៉េ កម្ពស់៤ជាន់ យកលំនាំតាមរចនាបទសំបូរព្រៃគុក ដែលជាអគារមានលក្ខណៈខ្មែរទំនើបស៊ីវីល័យ។

លោកអភិបាលខេត្តបានមានប្រសាសន៍បន្តទៀតថា ការសាងសង់អគារថ្មីនេះ បានទទួលការឯកភាពពីសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងមានការគាំទ្រពីលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ផងដែរ៕ឮ

អត្ថបទ៖ សំអឿន