សម្ដេចតេជោ ហ៊ុន សែន ណែនាំឲ្យសិក្សាជាមួយអ្នកច្បាប់ចំពោះការរៀបចំបង្កើតច្បាប់ ស្ដីពី ប្រវត្តិសាស្រ្ដ​យោធា

សម្ដេចតេជោ ហ៊ុន សែន នាយឧត្តមសេនីយ៍ផុតលេខផ្កាយមាស ៥ នាយករដ្ឋមន្ត្រីនៃព្រះរាជាណាចក្រកម្ពុជា បានណែនាំឲ្យសិក្សាជាមួយអ្នកច្បាប់ចំពោះការរៀបចំបង្កើតច្បាប់ ស្ដីពី ប្រវត្តិសាស្រ្ដ​យោធា ថាតើអាចបង្កើតទៅរួចដែរឬទេ?

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការណែនាំបែបនេះ បានធ្វើឡើងក្នុងពិធីអបអរសាទរប្រារព្ធខួប ៤៦ឆ្នាំ នៃទិវានៃការចងចាំដំណើរឆ្ពោះទៅរកការផ្តួលរំលំ របបប្រល័យពូជសាសន៍ ប៉ុល ពត (២០ មិថុនា ១៩៧៧-២០ មិថុនា ២០២៣) ដែលប្រារព្ធឡើងនៅក្រសួងការពារជាតិ នាព្រឹកថ្ងៃទី ២០ ខែមិថុនា ឆ្នាំ ២០២៣នេះ។

សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានស្នើសុំគោលការណ៍ពីសម្ដេចតេជោ ហ៊ុន សែន អំពីការរៀបចំបង្កើតច្បាប់ ស្ដីពី ប្រវត្តិសាស្រ្ដយោធា។

ជាការឆ្លើយតប សម្ដេចតេជោ ហ៊ុន សែន បានថ្លែងថា ចំពោះការស្នើឲ្យរៀបចំបង្កើតច្បាប់ ស្ដីពី ប្រវត្តិសាស្រ្ដយោធា គឺសម្ដេចណែនាំឲ្យសិក្សាជាមួយអ្នកច្បាប់ ថាតើអាចបង្កើតទៅរួចដែរឬទេ? បើតាមសម្ដេចតេជោ ហ៊ុន សែន កម្រិតត្រឹមចេញអនុក្រឹត្យ ស្ដីពី ការរៀបចំតំបន់ប្រវត្តិសាស្រ្ដយោធា គឺអាចធ្វើទៅបាន។

សម្ដេចតេជោ ហ៊ុន សែន ថ្លែងបែបនេះថា «ប៉ុន្តែចំណុចទី ៣ ទាក់ទិននឹងស្នើបង្កើតច្បាប់ ស្ដីពី ប្រវត្ដិសាស្រ្ដយោធា ខ្ញុំឲ្យសិក្សា ស្នើឲ្យសិក្សាជាមួយអ្នកច្បាប់ ថា យើងអាចធ្វើទៅរួចឬទេ? កម្រិតចេញអនុក្រឹត្យ ស្ដីពី ការរៀបចំតំបន់ប្រវត្តិសាស្រ្ដយោធា គឺយើងអាចធ្វើទៅបាន»៕