ស្ថាប័នជំនាញអំពាវនាវពលរដ្ឋប្រុងប្រយ័ត្នការឆបោកតាមតេឡេក្រាម

នៅថ្ងៃទី២២ ខែមិថុនា ឆ្នាំ២០២៣នេះ នាយកដ្ឋានប្រឆាំងបទល្មើសបច្ចេកវិទ្យា បានអំពាវនាវដល់ប្រជាពលរដ្ឋដែលជាអ្នកប្រើប្រាស់ប្រព័ន្ធតេឡេក្រាម ប្រុងប្រយ័ត្នចំពោះការបោកបញ្ឆោតថ្មីតាមរយៈកម្មវិធីតេឡេក្រាម (Telegram)។

ការអំពាវនាវនេះ ក្រោយនាយកដ្ឋានប្រឆាំងបទល្មើសបច្ចេកវិទ្យា នៃក្រសួងមហាផ្ទៃ បានទទួលព័ត៌មានស្តីពីការបោកបញ្ឆោតថ្មីដល់អ្នកប្រើប្រាស់កម្មវិធីតេឡេក្រាម (Telegram)។

បើតាមនាយកដ្ឋានប្រឆាំងបទល្មើសបច្ចេកវិទ្យា ក្រុមជនអានាមិកបានឆបោកដល់អ្នកប្រើប្រាស់កម្មវិធីតេឡេក្រាម (Telegram) តាមរយៈការផ្ញើដំណរភ្ជាប់បោកបញ្ឆោតក្លែងក្លាយ (Fake Link) ទៅកាន់សារទូរស័ព្ទ SMS ដើម្បីឱ្យអ្នកប្រើប្រាស់កម្មវិធីតេឡេក្រាម (Telegram) បំពេញព័ត៌មាន និងឈានទៅដល់ការយកគណនីអ្នកប្រើប្រាស់មកគ្រប់គ្រង។

អាស្រ័យដូច្នេះ នាយកដ្ឋានប្រឆាំងបទល្មើសបច្ចេកវិទ្យា បានអំពាវនាវដល់ប្រជាពលរដ្ឋដែលជាអ្នកប្រើប្រាស់កម្មវិធីតេឡេក្រាម (Telegram) ទាំងអស់មេត្តាប្រុងប្រយ័ត្ន និងកុំចុចលើដំណរភ្ជាប់ ឬដំណរភ្ជាប់ណាដែលមិនច្បាស់លាស់ និងបំពេញព័ត៌មានផ្ទាល់ខ្លួនឱ្យសោះ៕