អភិបាលរាជធានី អន្តរាគមន៍ជូនពលរដ្ឋរស់នៅបុរី វីអាយភី ក្រោយមានបុគ្គលមួយក្រុមចុះវាស់វែង និងបង្ខំឲ្យចេញ

លោក ឃួង ស្រេង អភិបាលនៃគណៈអភិបាលរាជធានីភ្នំពេញ បានជួបពិភាក្សារកដំណោះស្រាយជាមួយបងប្អូនប្រជាពលរដ្ឋរស់នៅបុរីវីអាយភី ក្រោយពីមានបុគ្គលមួយក្រុមបានចុះវាស់វែង និងបាញ់ថ្នាំទៅលើលំនៅឋានផ្ទះល្វែងរបស់ពួកគាត់ចំនួន៥ល្វែង ស្ថិតនៅភូមិម៉ឺន្ក្រា សង្កាត់ស្ពានថ្ម ខណ្ឌដង្កោ ជាមួយនឹងការបង្ខំអោយពួកគាត់ចាកចេញ។

ការពិភាក្សារកដំណោះស្រាយរបស់លោក ឃួង ស្រេង ជាមួយបងប្អូនប្រជាពលរដ្ឋតំណាងឲ្យប្រជាពលរដ្ឋមានបញ្ហាជាមួយក្រុមហ៊ុនបុរី VIP ជាច្រើនរូប បានធ្វើឡើងនាព្រឹកថ្ងៃអាទិត្យ ទី២៥ ខែមិថុនា ឆ្នាំ២០២៣នេះ នៅសាលារាជធានីភ្នំពេញ។

ប្រជាពលរដ្ឋរស់នៅផ្ទះល្វែងបុរី វីអាយភី ប្រមាណ៥ល្វែងត្រូវបានជនមួយក្រុមចុះទៅធ្វើការវាស់វែងលំនៅដ្ឋានរបស់ពួកគាត់ និងបានបង្ខំឲ្យពួកគាត់ ចាកចេញពីបុរី វីអាយភីនេះ។ ជុំវិញបញ្ហានេះប្រជាពលរដ្ឋ បាននាំគ្នាមកផ្តល់ដំណឹងជូនរដ្ឋបាលរាជធានីភ្នំពេញ ដើម្បីអោយរដ្ឋបាលរាជធានីជួយអន្តរាគមន៍ដោះស្រាយ ដោយសារតែវិមានវិវាទនេះ រដ្ឋបាលរាជធានីភ្នំពេញបាននិងកំពុងព្យាយាមដោះស្រាយជាច្រើនលើកច្រើនសាររួចមកហើយនោះ។

ពាក់ព័ន្ធនឹងបញ្ហាខាងលើ នៅព្រឹកថ្ងៃអាទិត្យ ទី២៥មិថុនានេះ បន្ទាប់ពីទទួលបានដំណឹងនេះភ្លាម អភិបាលនៃគណៈអភិបាលរាជធានីភ្នំពេញ លោកឃួង ស្រេងបានចុះមកជួបផ្ទាល់ជាមួយបងប្អូនប្រជាពលរដ្ឋនៅសាលារាជធានីភ្នំពេញដើម្បីរកដំណោះស្រាយជូនពួកគាត់។ ជាលទ្ធផលលោក ឃួង ស្រេង បានសម្រេ អនុញ្ញាតអោយប្រជាពលរដ្ឋ ដែលត្រូវគេវាស់វែងលំនៅដ្ឋាន និងបានបង្ខំឲ្យពួកគាត់ចាកចេញពីបុរីនោះ រស់នៅជាធម្មតាវិញ ដោយរង់ចាំការដោះស្រាយរបស់និយ័តករ អាជីវកម្ម អចលវត្ថុ និងបញ្ចាំនៃក្រសួងសេដ្ឋកិច្ច និងហិរញ្ញវត្ថុ និងរដ្ឋបាលរាជធានីភ្នំពេញ៕

អត្ថបទ៖ ស្រីរ័ត្ន