ព័ត៌មានជាតិ

ពលករខ្មែរ៣៧នាក់ ត្រូវទាហានឈុតខ្មៅថៃ ចាប់ខ្លួន

បានផុស

៥ years មុន

នៅ

ថ្ងៃពុធ ២៧ មករា ២០២១

ដោយ

ពលករខ្មែរប្រុសស្រីចំនួន៣៧នាក់ ដែលលួចឆ្លងដែនខុសច្បាប់ចូលទៅក្នុងប្រទេសថៃត្រូវសមត្ថកិច្ចទាហានកងរយទី១៣០៥ ទាហានឈុតខ្មៅទី១៣ ចាប់ឃុំខ្លួន។

តាមប្រភពព័ត៌មានច្បាស់ការ បានរាយការណ៍ពីខេត្តស្រះកែវប្រទេសថៃ ថា កាលពីព្រលប់ថ្ងៃទី២៦ ខែមករា ឆ្នាំ២០២១នេះ នៅក្នុងទឹកដីខេត្តស្រះកែវ ចាន់ បុរី និងរ៉ាក់យ៉ង ប្រទេសថៃ មានក្រុមទាហានឈុតខ្មៅទី១៣ ដោយទទួលបានសេចក្ដីរាយការណ៍ថា មានពលករខ្មែរជាច្រើនលួចចូលប្រទេសដោយខុសច្បាប់ នៅក្នុងភូមិសាស្ត្រទទួលខុសត្រូវ ទើបចាត់កម្លាំងក្រុមប្រតិបត្តិការព័ត៌មាន និងកម្លាំងចល័តរហ័ស សហការជាមួយនគរបាលអន្តោប្រវេសន៍ខេត្តស្រះកែវ កម្លាំងនគរបាលស្រុក ខ្លងហាត និងអាសាស្ម័គ្រ ស្រុកខ្លងហាត រួមគ្នាចេញល្បាតដើម្បីរុករកក្រុមពលករខាងលើ។

ប្រភពបានបន្តទៀតថា សមត្ថកិច្ចទៅដល់បរិវេណស្រះចាក់សម្រាមភូមិខៅឌីន ហើយបានប្រទះឃើញពលករខ្មែរលួចចូលប្រទេសដោយខុសច្បាប់ ដែលប្រមូលផ្ដុំគ្នានៅបរិវេណបង្គោលគីឡូម៉ែត្រTV១២៨៩៩១ភូមិខៅឌីន ឃុំខ្លងហាត ស្រុកខ្លងហាត ខេត្តស្រះកែវ ចម្ងាយពីបន្ទាត់ព្រំដែនកម្ពុជា-ថៃ ប្រមាណ១.៣គីឡូម៉ែត្រ ទើបសមត្ថកិច្ចចាប់ឃុំខ្លួនពលករខ្មែរទាំងនោះតែម្តង។ ចំនួនពលករ៣៧នាក់នោះ គឺមិនមានឯកសារធ្វើដំណើរអ្វីទាំងអស់ បន្ទាប់មកសមត្ថកិច្ចបានឃុំខ្លួនពលករខ្មែរទាំងនោះតែម្តង៕

អត្ថបទ ៖ ពៅរិ