ឆ្នាំនេះ ស្រូវឡើងថ្លៃខ្ពស់មិនធ្លាប់មាន រយៈពេល ៣ ឆ្នាំ ចុងក្រោយ

ឆ្នាំ២០២៣ តម្លៃស្រូវនៅទីវាល ជាពិសេសប្រភេទពូជស្រូវប្រាំង IR និង OM មានតម្លៃខ្ពស់មិនធ្លាប់មាន នៅក្នុងរយៈពេល៣ឆ្នាំចុងក្រោយមកនេះ។ នេះបើតាមសេចក្តីប្រកាសព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២២ ខែកក្កដានេះ។  

ក្រសួងកសិកម្ម បានឱ្យដឹងថា យោងតាមតម្លៃស្រូវនៅទីវាលដែលប្រមូលដោយសហព័ន្ធស្រូវអង្ករកម្ពុជា នៅឆ្នាំ២០២៣ នេះ ស្រូវប្រភេទ IR មានតម្លៃ ១ ០៤៧រៀលក្នុងមួយគីឡូក្រាម ខណៈស្រូវប្រភេទ OM មានតម្លៃ១ ០២៩រៀលក្នុងមួយគីឡូក្រាម។ ចំណែកឯប្រភេទពូជស្រូវសែនក្រអូបវិញ គឺមានតម្លៃខ្ពស់ជាងគ បើធៀបនឹងប្រភេទពូជស្រូវ IR និង OM ប៉ុន្តែតម្លៃស្រូវសែនក្រអូបមិនសូវមានការប្រែប្រួលទេក្នុងរយៈពេល៣ឆ្នាំចុងក្រោយនេះ ដោយជាមធ្យម មានតម្លៃចន្លោះពី ១០០០ ទៅ ១២៦០រៀលក្នុងមួយគីឡូក្រាម។

ក្រសួងកសិកម្ម បន្ថែមទៀតថា ក្រៅតែពីថ្លៃស្រូវមានស្ថានភាពល្អប្រសើរ តម្លៃជីកសិកម្ម ចាប់តាំងពីខែមករា ឆ្នាំ២០២៣ រហូតមកទល់ពេលនេះ មានការធ្លាក់ចុះជាបន្តបន្ទាប់។ ក្នុងនោះ ជីអ៊ុយរ៉េ ធ្លាក់ថ្លៃពី ៣៥ដុល្លារក្នុងមួយបាវ មកនៅត្រឹម ២៣,៥ដុល្លារក្នុងមួយបាវ ខណៈជីដេអាប៉េ ធ្លាក់ថ្លៃពី ៤២ដុល្លារមួយបាវ មកនៅត្រឹម ៣៦ដុល្លារក្នុងមួយបាវ។ លើសពីនេះទៀត តម្លៃថ្នាំកសិកម្មមួយចំនួនក៏ថយចុះផងដែរ ដូចជា ថ្នាំកម្ចាត់ស្មៅ ថ្នាំកម្ចាត់ជំងឺ ថ្នាំសម្លាប់សត្វល្អិត ខណៈពេលដែលប្រភេទថ្នាំកសិកម្មផ្សេងទៀតមានការប្រែប្រួលតម្លៃតិចតួច។

តាមរយៈលទ្ធផលនេះ ត្រូវបានក្រសួងកសិកម្ម បញ្ជាក់ថា កើតចេញពីការចូលរួមចំណែក និងកិច្ចខិតខំប្រឹងប្រែងរបស់ក្រសួង ព្រមទាំងស្ថាប័នពាក់ព័ន្ធ ដោយមានការគាំទ្រពីរាជរដ្ឋាភិបាលកម្ពុជា តាមរយៈការទម្លាក់ថវិកាទាន់ពេលវេលា សម្រាប់អន្តរាគមន៍ទប់ទល់នឹងការធ្លាក់ចុះតម្លៃស្រូវក្នុងរដូវប្រមូលផល ការសម្រួលការនាំចេញស្រូវ-អង្ករ និងការបើកឱកាសប្រកួតប្រជែងលើទីផ្សារសម្រាប់ជីនិងថ្នាំកសិកម្មដែលមានគុណភាព ជាដើម៕