លោក ម៉ៅ ធនិន អភិបាលខេត្តកំពត បោះឆ្នោតនៅការិយាល័យ​សាលាបឋមសិក្សាសម្ដេចតា ក្រុងកំពត

លោក ម៉ៅ ធនិន អភិបាលខេត្តកំពត ព្រមទាំងភរិយាលោកស្រី ហ៊ុន ចាន់ធី ម៉ៅ ធនិន និងក្រុមគ្រួសារ បានអញ្ជើញ​ទៅបោះឆ្នោតជ្រើសតាំងតំណាងរាស្ត្រនីតិកាលទី៧ រួចរាល់ នៅការិយាល័យលេខ០៨៨៥ នៅសាលាបឋមសិក្សា សម្ដេចតា ដែលស្ថិតនៅក្នុងសង្កាត់កំពង់កណ្ដាល ក្រុងកំពត ខេត្តកំពតនាព្រឹកថ្ងៃទី ២៣ ខែកក្កដា ឆ្នាំ២០២៣នេះ។

ខេត្តកំពត ប្រជាពលរដ្ឋដែលមានអាយុ១៨ឆ្នាំឡើងទៅ មានចំនួន៤២០,៥៤៨នាក់ ស្រី២៣១,០៤២នាក់។ ដោយមាន​ការិយាល័យបោះឆ្នោតសរុបចំនួន ១,០៥៤ការិយាល័យ មានអ្នកសង្កេតការណ៍ជាតិសរុប ៦,៣០០នាក់ ស្រី២,៨២៩នាក់ មកពីអង្គការ និងសមាគមន៍ចំនួន២០ និងប្រជាពលរដ្ឋដែលមានឈ្មោះ​នៅក្នុងបញ្ជីបោះឆ្នោតដែលមានចំនួន ៤២១,១១៩នាក់។

ខេត្តកំពត មានគណបក្សនយោបាយចំនួន៥ ដែលឈរឈ្មោះសម្រាប់បោះឆ្នោតជ្រើសតាំងតំណាងរាស្ត្រ នីតិកាលទី៧ ថ្ងៃទី២៣ ខែកក្កដា ឆ្នាំ២០២៣នេះ រួមមាន ទី១ គណបក្សប្រជាជនកម្ពុជា ទី២ គណបក្សខ្មែររួបរួមជាតិ ទី៣ គណបក្សហ៊្វុនស៊ិនប៉ិច ទី៤ គណបក្សឯកភាពជាតិខ្មែរ ទី៥ គណបក្សកម្លាំងប្រជាធិបតេយ្យ។

សូមបញ្ជាក់ថា ការបោះឆ្នោតជ្រើសតាំងអ្នកតំណាងរាស្ត្រ អាណត្តិទី៧ នីតិកាលទី៧ ខែកក្កដាឆ្នាំ២០២៣នេះ មានការិយាល័យ២៣,៧៨៩ការិយាល័យនេះ ដែលប្រជាពលរដ្ឋមានសិទ្ធិទៅបោះឆ្នោតដែលមានចំនួន៩,៧១០,៦៥៥នាក់។

សូមជំរាបថាក្នុងការបោះឆ្នោតជ្រើសរើសតាំងតំណាងរាស្ត្រអាណត្តិទី៧នេះ មានគណបក្សនយោបាយ ដែលបានចូល​រួមប្រកួតប្រជែងមានចំនួន១៨៕

អត្ថបទ៖ សឹង រ៉ាត់