អ្នកកែច្នៃ និងនាំចេញផលកសិកម្មកម្ពុជា រំពឹងមានកំណើនខ្ពស់​ទៅទីផ្សារចិន

អ្នកផលិត កែច្នៃ និងនាំចេញផលកសិកម្មកម្ពុជា ដាក់ក្តីរំពឹងខ្ពស់លើការនាំចេញទៅផ្សារចិន និងសង្ឃឹមអាចបង្កើត​ប្រាក់ចំណេញបានច្រើនជាងមុន បន្ទាប់ពីរាជរដ្ឋាភិបាល​ សម្របសម្រួលឱ្យមានការដឹកជញ្ជូនកសិផល ដោយឆ្លងកាត់​ប្រទេសឡាវ ទៅចិនតាមមធ្យោបាយផ្លូវគោក។ ដោយគម្រោងនេះ ត្រូវបានមើលឃើញថា ជួយបន្ធូរបន្ថយការចំណាយ​លើថ្លៃដឹកជញ្ជូន និងភាពស្មុគស្មាញ ដែលកម្ពុជា ធ្លាប់តែពឹងលើថៃ និងវៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កញ្ញា សឿន សុទ្ធនីតា សហស្ថាបនិកសិប្បកម្មកែច្នៃស្វាយចន្ធីស្ទឹងត្រែង បានលើកឡើងថា ការសម្របសម្រួលឱ្យមាន​ការដឹកជញ្ជូនតាមប្រទេសឡាវទៅកាន់ទីផ្សារចិន គឺជារឿងប្រសើរបំផុត ជាពិសេសសម្រាប់ក្រុមហ៊ុនកញ្ញា​ដែលមាន​ទីតាំង​ស្ថិតនៅខេត្តស្ទឹងត្រែងជាប់ព្រំប្រទល់ឡាវស្រាប់។ កញ្ញាបន្តដូច្នេះ« ខ្ញុំគិតថា វានឹងកាន់តែមានភាពល្អប្រសើរ សម្រាប់ក្រុមហ៊ុននាងខ្ញុំ ព្រោះទីតាំងរបស់ក្រុមហ៊ុនស្ថិតនៅខេត្តស្ទឹងត្រែង ដែលនៅជិតប្រទេសឡាវ»។

បើតាមកញ្ញា សឿន សុទ្ធនីតា បានបញ្ជាក់ថា សិប្បកម្មកែច្នៃស្វាយចន្ធីស្ទឹងត្រែង បច្ចុប្បន្ននេះ ធ្វើការកែច្នៃគ្រាប់ស្វាយ​ចន្ទីទាំងពាក់កណ្តាលសម្រេច និងផលិតផលសម្រេច ដោយមានសមត្ថភាពផលិតបានចំនួន ១៥តោនក្នុងមួយខែ  និងគ្រោងពង្រីកឱ្យបាន ២០តោន ឆាប់ៗនេះ។ កញ្ញា សុទ្ធនីតា បានឱ្យដឹងទៀតថា សព្វថ្ងៃក្រុមហ៊ុន បានធ្វើការនាំ​ចេញទៅប្រទេស កូរ៉េ, អាមេរិក, អង់គ្លេស, សឹង្ហបុរី និងគ្រោងពង្រីកទៅកាន់ទីផ្សារប្រទេសផ្សេងៗទៀតដូចជា តៃវ៉ាន់ និងស្វីស ជាដើម។

ក្រៅពីនេះ កញ្ញា សឿន សុទ្ធនីតា បានឱ្យដឹងទៀតថា សិប្បកម្មកែច្នៃស្វាយចន្ធីស្ទឹងត្រែង បានរួមចំណែកជាមួយ​រដ្ឋាភិបាល​តាមរយៈបណ្តុះបណ្តាលប្រជាកសិករនៅក្នុងតំបន់ប្រមាណជាង ១០០គ្រួសារ ឱ្យមានបច្ចេកទេស​នៅក្នុងការដាំដុះ ដើម្បីទទួលបានទិន្នផលខ្ពស់ ជាពិសេសបានផ្តល់តម្លៃផលិតផលរបស់កសិករលើសទីផ្សារពី ១០០រៀលទៅ ៣០០រៀល ផងដែរ។

ដូចគ្នានេះដែរ លោក វណ្ណ ឬទ្ធី នាយកប្រតិបត្តិនាយកដ្ឋាននាំចេញកសិផលនៃក្រុមហ៊ុនអង្គរហ្រ្គីន បានលើកឡើងថា កន្លងមកការនាំចេញទៅចិនត្រូវឆ្លងកាត់ប្រទេសថៃ និងវៀតណាម មានភាពស្មុគស្មាញច្រើន ពិបាកក្នុងដឹកជញ្ជូន។ លោកថា ប្រសិនបើមានការសម្របសម្រួលឱ្យមានការនាំចេញតាមច្រកប្រទេសឡាវ ដោយពុំមានរបាំងសាំញ៉ាំច្រើន ជាឱកាសសម្រាប់នាំចេញទំនិញកសិផលរបស់កម្ពុជា កាន់តែធំបន្ថែមទៀត ទៅទីផ្សារចិន។ លោកបន្ថែមបែបនេះថា « ការដឹកជញ្ជូនឆ្លងកាត់ឡាវ នឹងជួយយើងបានច្រើន ប្រសិនបើធ្វើទៅរួចហើយតម្លៃទាប និងពុំមានរំបាំងច្រើន»។

រយៈពេល ៣ឆ្នាំចុងក្រោយនេះ លោក វណ្ណ ឬទ្ធី បានគូសបញ្ជាក់ថា ក្រុមហ៊ុនអង្គរហ្រ្គីនបាននាំចេញស្វាយកែវរមៀន​ប្រមាណជាង ៥ពាន់តោន ទៅកាន់ទីផ្សារបរទេស។ បើតាមលោក ឬទ្ធី តម្លៃដឹកជញ្ជូនធូរថ្លៃ ការនាំចេញបានច្រើន នឹងជួយបង្កើតទីផ្សារជូនកសិករខ្មែរយើងកាន់តែច្រើនថែមទៀត។

លោក គង់ វិមាន នាយកខុទ្ទកាល័យ និងអ្នកនាំពាក្យក្រសួងសាធារណការ និងដឹកជញ្ជូន បានលើកឡើងក្នុងកិច្ច​ពិភាក្សា​រវាងអ្នកវិនិយោគិនចិន និងទីប្រឹក្សាសមាគមស្វាយចន្ទីកម្ពុជា កាលពីថ្ងៃទី២៤ ខែកក្កដា ថា ដោយសារការដឹក​ជញ្ជូនឆ្លងកាត់ប្រទេសថៃ និងវៀតណាម មានភាពស្មុគស្មាញ និងចំណាយខ្ពស់ អ្នកវិនិយោគិនចិន ដែលមានរោងចក្រ​នៅកម្ពុជា បានស្នើឱ្យក្រសួង សម្របសម្រួលផ្នែកច្បាប់ ដើម្បីងាកមកដឹកជញ្ជូនឆ្លងកាត់ប្រទេសឡាវ ទៅកាន់ចិនវិញ។ 

អ្នកនាំពាក្យរូបនេះ បានសង្កត់ធ្ងន់ថា ប្រសិនបើ ដំណើរការផ្លូវពាណិជ្ជកម្មនេះជោគជ័យ ការនាំចេញកសិផលរបស់​កម្ពុជាទៅកាន់ទីផ្សារចិន កាន់តែមានភាពងាយស្រួល និងកាត់បន្ថយថ្លៃចំណាយបានច្រើន។

បើតាមគម្រោង ផ្លូវពាណិជ្ជកម្មថ្មីនេះ ត្រូវចេញពីភ្នំពេញ ឆ្លងកាត់ខេត្តកំពង់ចាម ត្បូងឃ្មុំ ក្រចេះ និងខេត្តស្ទឹងត្រែង ទៅកាន់ប្រទេសឡាវ ហើយដឹកជញ្ជូនបន្តពីឡាវតាមរយៈរថភ្លើងល្បឿនលឿន ទៅប្រទេសចិន៕