លោក សុខ ឥសាន ចាត់ទុកការប្រកាសរិតត្បិតរបស់អាមេរិកមកលើកម្ពុជាថា ជារឿងធម្មតាៗ

លោក សុខ ឥសាន អ្នកនាំពាក្យគណបក្សប្រជាជនកម្ពុជា បានចាត់ទុកការរិតត្បិតដូចជា ឈប់ផ្ដល់ជំនួយ រឹតបន្តឹងការផ្ដល់ទិដ្ឋការមកលើមន្ត្រីរដ្ឋាភិបាលពីសំណាក់សហរដ្ឋអាមេរិកមកលើកម្ពុជា ក្រោយការបោះឆ្នោតថា គឺជារឿងធម្មតាៗទៅហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យរូបនេះចាត់ទុកបែបនេះ ក្រោយសហរដ្ឋអាមេរិក និងសហភាពអឺរ៉ុប បានចេញសេចក្ដីថ្លែងការណ៍ថា ការបោះឆ្នោតនៅកម្ពុជា ជាការបោះឆ្នោតដែលរៀបចំទុក មិនទទួលស្គាល់បោះឆ្នោត ថែមទាំងរឹតបន្តឹងការផ្ដល់ទិដ្ឋការមកលើមន្ត្រីរដ្ឋាភិបាល និងលែងផ្ដល់ជំនួយមកកម្ពុជា។ លោកថា វាជារឿងធម្មតាៗ នៅលើពិភពលោកដែលមាននិន្នាការ មានមនោគមន៍វិជ្ជានយោបាយខុសៗគ្នា ដោយក្រោយការបោះឆ្នោតរួច តែងតែមានការវាយតម្លៃដោយឡែកៗខុសពីគ្នា។ លោកថា កម្ពុជា មិនមានលទ្ធភាពហាមឃាត់មិនឱ្យប្រទេសឯទៀតមកវាយតម្លៃ ចេញសេចក្ដីថ្លែងការណ៍ជុំវិញការបោះឆ្នោតបានឡើយ។

បើទោះបីប្រទេសទាំងនេះរិះគន់ ប៉ុន្តែ ការបោះឆ្នោតនៅកម្ពុជា មានអ្នកសង្កេតការណ៍អន្តរជាតិចូលរួមចំនួន ៣៣៣នាក់ មកពី៦៥ប្រទេស និងស្ថាបន័អន្តរជាតិ ក្នុងនោះ ក៏មានវត្តមាន លោកP artido de Nuno Nabiam នាយករដ្ឋមន្ត្រីប្រទេសហ្គីណេប៊ីសាវ ចូលរួមសង្កេតការណ៍ផងដែរ។ ជាការកត់សម្គាល់ រាល់ប្រទេសដែលបានវាយតម្លៃការបោះឆ្នោតនៅកម្ពុជាថារៀបចំទុកមុន គ្មានតម្លាភាព គឺប្រទេសទាំងនោះ មិនបានចុះឈ្មោះ មិនបានបញ្ជូនអ្នកសង្កេតការណ៍មកសង្កេតការបោះឆ្នោតឡើយ។

សម្រាប់លោក សុខ ឥសាន រាល់ប្រទេសដែលមិនបញ្ចូនអ្នកសង្កេតការណ៍មកសង្កេតការណ៍ មកពិនិត្យការបោះឆ្នោត ហើយវាយតម្លៃថាការបោះឆ្នោតនៅកម្ពុជាថារៀបចំទុកមុននេះ គឺមិនអាចទុកជាការវាយតម្លៃ មិនអាចចាត់ទុកជារបាយការណ៍ផ្លូវការបានទេ៕

អត្ថបទ៖ ង៉ិល ណារ៉ាត់