កម្ពុជា-ថៃ នឹងបន្តជួយគ្នាទប់ស្កាត់ និងប្រឆាំងបទល្មើសឧក្រិដ្ឋឆ្លងដែនគ្រប់ប្រភេទ

ប្រទេសកម្ពុជា និងថៃ នឹងនៅតែបន្តពង្រឹងទំនាក់ទំនងកិច្ចសហការរវាងប្រទេសទាំង២ ដើម្បីចូលរួមបង្ការទប់ស្កាត់ និងប្រឆាំងបទល្មើសឧក្រិដ្ឋឆ្លងដែននៅព្រំដែនកម្ពុជា-ថៃ។ ការអះអាងបន្តកិច្ចសហប្រតិបត្តិការនេះ គឺធ្វើឡើងនៅក្នុងជំនួបរវាងលោក ស ថេត អគ្គស្នងការនៃអគ្គស្នងការដ្ឋាននគរបាលជាតិ និងលោក Surachate Hakparn អគ្គស្នងការរងនគរបាលភូមិន្ទថៃ នៅទីស្តីការក្រសួងមហាផ្ទៃ នៅថ្ងៃទី០៤ ខែកញ្ញា ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងជំនួប លោក Surachate Hakparn អគ្គស្នងការរងនគរបាលភូមិន្ទថៃ បានបញ្ជាក់ពីការបន្តពង្រឹង និងពង្រីកទំនាក់ទំនងកិច្ចសហប្រតិបត្តិការ រវាងនគរបាលជាតិកម្ពុជា និងនគរបាលភូមិន្ទថៃ ឱ្យមានភាពរឹងមាំ និងជិតស្និទ្ធជាមួយគ្នាបន្ថែមទៀត ដើម្បីសម្រេចបានលទ្ធផលធំៗ និងការបង្ការទប់ស្កាត់ និងប្រឆាំងបទល្មើសឧក្រិដ្ឋឆ្លងដែនគ្រប់ប្រភេទ។ ចំណែក លោក ស ថេត ក៏បានឯកភាពចំពោះការលើកឡើងរបស់អគ្គស្នងការរងនគរបាលភូមិន្ទថៃ ក្នុងការបន្តទំនាក់ទំនង និងកិច្ចសហប្រតិការ ដើម្បីទប់ស្កាត់ និងប្រឆាំងបទល្មើសឧក្រិដ្ឋឆ្លងដែនរវាងប្រទេសកម្ពុជា និងថៃផងដែរ

ឆ្លៀតក្នុងឱកាសនោះដែរ លោក Surachate Hakparn អគ្គស្នងការរងនគរបាលភូមិន្ទថៃ ក៏បានអបអរដល់លោក ស ថេត ដែលទើបតែត្រូវបានតែងតាំងជាអគ្គស្នងការ នៃអគ្គស្នងការដ្ឋាននគរបាលជាតិ កាលពីថ្ងៃទី២៨ ខែសីហា ឆ្នាំ២០២៣ កន្លងទៅនេះ៕