ខណ្ឌរដ្ឋបាលជលផលកំពង់ចាម បន្តចុះបង្ក្រាបបទល្មើសនេសាទ ក្នុងបឹងជ្រោយ ស្រុកជើងព្រៃ

ខណ្ឌរដ្ឋបាលជលផលកំពង់ចាមសហការជាមួយកងកម្លាំងសមត្ថកិច្ច បន្តចុះបង្ក្រាបបទល្មើសនេសាទ ក្នុងបឹងជ្រោយ ដែលស្ថិតនៅក្នុងភូមិសាស្ត្រ ស្រុកជើងព្រៃ ខេត្តកំពង់ចាម នារដូវត្រីពងកូន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី0៤ ខែកញ្ញា ឆ្នាំ២០២៣ លោក អ៊ុក ណារិន នាយខណ្ឌជលផលកំពង់ចាមបានសហការ ជាមួយអាជ្ញាធរស្រុកជើងព្រៃ កម្លាំងអធិការដ្ឋាននគរបាលស្រុកជើងព្រៃ កម្លាំងប៉ុស្តិ៍សូទិព្វ និងដោយមានការអនុញ្ញាតពីលោក វង្ស ប៊ុនវិសុទ្ធ ព្រះរាជអាជ្ញាអយ្យការអមសាលាដំបូងខេត្តកំពង់ចាម បានបន្តចុះទប់ស្កាត់ និងបង្រ្កាបបទល្មើសជលផលបានចំនួនបីករណី។

លោក អ៊ុក ណារិន នាយខណ្ឌជលផលកំពង់ចាម បានបញ្ជាក់ឲ្យដឹងថា ជាលទ្ធផលក្នុងប្រតិបត្តិការបង្ក្រាបនេះ កម្លាំងសមត្ថកិច្ច បានធ្វើការរុះរើ និងកាត់បំផ្លាញ់ចោលវត្ថុតាងនៃបទល្មើសជលផលនៅនឹងកន្លែង ដោយក្នុងនោះ មាន ឧបករណ៍លូស្បៃមុងចំនួន២៣មាត់, របាំងស្បៃមុងចំនួន៥កន្លែងសរុបប្រវែង១១៥០ម៉ែត្រ, បង្គោលចម្រឹងចំនួន ២៤៥ដើម និងធ្វើការប្រលែងកូនត្រីចម្រុះ ២២៨គីឡូក្រាម។

ទន្ទឹមនឹងនេះដែរ លោក អ៊ុក ណារិន ក៏បានផ្សព្វផ្សាយអំពាវនាវបន្ថែមដល់ប្រជាពលរដ្ឋ ដែលរស់នៅតាមតំបន់ទន្លេ បឹង បួរ ព្រែក និងប្រភពត្រីពង សូមកុំប្រើប្រាស់ឧបករណ៍នេសាទខុសច្បាប់ ដោយធ្វើយ៉ាងណាថែរក្សាតំបន់ជំរកត្រីពងកូន និងរួមគ្នានេសាទឲ្យបានត្រឹមត្រូវទៅតាមច្បាប់ជលផលដែលបានកំណត់៕

អត្ថបទ និងរូបភាព៖ ឡេក ចាន់ពេជ្រ