ព័ត៌មានជាតិ

មន្ត្រីជលផលកំពង់ចាម បន្តចុះបង្ក្រាបឧបករណ៍នេសាទខុសច្បាប់ នៅភូមិសាស្ត្រស្រុកព្រៃឈរ

បានផុស

២ ថ្ងៃ មុន

នៅ

ថ្ងៃពុធ ១២ វិច្ឆិកា ២០២៥

ដោយ

ដើម្បីចូលរួមទប់ស្កាត់ និងបង្ក្រាបបទល្មើសនេសាទខុសច្បាប់ នៅតាមព្រែក បឹង និងទន្លេ ក្នុងភូមិសាស្ត្រខេត្តកំពង់ចាម មន្ត្រីខណ្ឌរដ្ឋបាលជលផលកំពង់ចាម បានបន្តចុះបង្ក្រាបឧបករណ៍នេសាទខុសច្បាប់នៅភូមិសាស្ត្រស្រុកស្រុកព្រៃឈរ និងសហគមន៍នេសាទឃុំមៀន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី ១១ ខែវិច្ឆិកា ឆ្នាំ ២០២៥ ម្សិលមិញ ខណ្ឌរដ្ឋបាលជលផលកំពង់ចាម សហការជាមួយអាជ្ញាធរស្រុកព្រៃឈរ និងសហគមន៍សាមគ្គីឃុំមៀន និងដោយមានការសម្របសម្រួលពី លោក វង្ស ប៊ុនវិសុទ្ធ ព្រះរាជអាជ្ញា នៃអយ្យការអមសាលាដំបូងខេត្តកំពង់ចាម បានចុះប្រតិបត្តិការត្រួតពិនិត្យ និងបង្ក្រាបបទល្មើសជលផល បាន ៣ ករណី ក្នុងនោះ មន្ត្រីជំនាញ បានកសាងសំណុំរឿងតាមនីតិវិធីច្បាប់ស្ដីពីជលផល និងរុះរើកាប់បំផ្លាញចោលវត្ថុតាង នៃបទល្មើសជលផលនៅនឹងកន្លែង។

លោក លី ស្រ៊ី នាយខណ្ឌស្ដីទីជលផលកំពង់ចាម បានឲ្យដឹងថា ជាលទ្ធផល ប្រតិបត្តិការចុះបង្ក្រាបបទល្មើសជលផលនេះដែរ ក្រុមការងារបានរុះរើកាប់បំផ្លាញចោលវត្ថុតាងនៅចំណុចស្រុកព្រៃឈរ និងសហគមន៍នេសាទសាមគ្គីឃុំមៀន។ ចំពោះឧបករណ៍ដែលបំផ្លាញចោលរួមមាន ៖ ឧបករណ៍លូស្បៃមុងចំនួន ៣៣ មាត់ , របាំងស្បៃមុងប្រវែង ១ ៧៥៥ ម៉ែត្រ , បង្គោលចម្រឹងចំនួន ៨៨០ ដើម , និងចាក់លែងត្រីចម្រុះទម្ងន់ ៦២ គីឡូក្រាម ចាក់ចូលបឹងធម្មជាតិវិញផងដែរ។

ទន្ទឹមនេះ លោក លី ស្រ៊ី ក៏បានបន្តចុះអប់រំផ្សព្វផ្សាយដល់ប្រជានេសាទ កុំប្រើប្រាស់ឧបករណ៍ល្មើសច្បាប់ និងស្នើសុំឲ្យអាជ្ញាធរមូលដ្ឋានចូលរួមសហការរាយការណ៍ និងបង្ក្រាប។ បន្ថែមនោះ អ្វីដែលមន្ត្រីជំនាញស្នើសុំទៀតនោះ គឺសូមឲ្យប្រជាពលរដ្ឋចូលរួមសហការទប់ស្កាត់ការនេសាទខុសច្បាប់ ដើម្បីរក្សាពូជត្រីបានច្រើន៕

អត្ថបទ និង រូបភាព ៖ ឡេក ចាន់ពេជ្រ