ស្រូវវស្សានៅខេត្តព្រៃវែងជិត ២៦ ម៉ឺនហិកតាធ្វើបានលើសផែនការ

លោក ​តន់ វ៉ាន់ថារ៉ា រដ្ឋលេខាធិការក្រសួងធនធានទឹក និងឧតុនិយម និងជាប្រធានក្រុមការងារសម្របសម្រួលការងារគ្រប់គ្រងធនធានទឹក និងឧតុនិយមប្រចាំខេត្តព្រៃវែង និងខេត្តស្វាយរៀងនៅថ្ងៃទី ៦ ខែកញ្ញា ឆ្នាំ ២០២៣ បានចុះពិនិត្យមើលការងារបង្កបង្កើនផល និងពិនិត្យស្ថានភាពទឹកនៅប្រព័ន្ធធារាសាស្ត្របឹងផ្ទោល និងប្រព័ន្ធធារាសាស្រ្តវ៉ៃគោក្នុងខេត្តព្រៃវែង។

ក្នុងឱកាសនោះ លោកប្រធានមន្ទីរខេត្តព្រៃវែងបានឱ្យដឹងថា ស្ថានភាពទឹកនៅក្នុងខេត្តគឺមានទឹកគ្រប់គ្រាន់​សម្រាប់ការងារ​បង្កបង្កើនផលស្រូវវស្សា និងការប្រើប្រាស់ប្រចាំថ្ងៃ។ ភ្លៀងធ្លាក់ជាបន្តបន្ទាប់ បង្កឱ្យមានទឹកបរិបូរណ៍តាមប្រឡាយមេ និងអាងស្តុកទឹកដែលមាននៅក្នុងខេត្ត។​

លោកបញ្ជាក់ថា​ គិតត្រឹមថ្ងៃទី ៣០ ខែសីហា ឆ្នាំ២០២៣ ការបង្កបង្កើនផលស្រូវវស្សា ក្នុងខេត្តព្រៃវែងអនុវត្តបានចំនួន ជិត ២៦ ម៉ឺនហិកតា (២៥៩ ៥៨៣) គឺស្មើនឹង ១០៣,៨៣ ភាគរយ​ នៃផែនការ ២៥ ម៉ឺនហិកតា។

ជាមួយគ្នានោះលោករដ្ឋលេខាធិការ ក៏បានជួបសំណេះសំណាលជាមួយមន្ត្រី នៃមន្ទីរធនធានទឹក និងឧតុនិយមខេត្តព្រៃវែង និងបានណែនាំលោកប្រធានមន្ទីរ និងមន្ត្រីទាំងអស់បន្តខិតខំយកចិត្តទុកដាក់ខ្ពស់ចំពោះភារកិច្ចរបស់ខ្លួន ព្រមទាំងត្រៀមលក្ខណៈ​ដើម្បីឆ្លើយតបឱ្យបានទាន់ពេលវេលាចំពោះគ្រោះធម្មជាតិផ្សេងៗដែលអាចកើតមានឡើងជាយថាហេតុនាពេលខាងមុខ៕