តើកូនៗលោក ឱម យ៉ិនទៀង កំពុងកាន់តួនាទីនៅស្ថាប័នណាខ្លះ?

ក្នុងចំណោមទេសរដ្ឋមន្ត្រីចំនួន២១រូប នៃសមាសភាពគណៈរដ្ឋមន្ត្រីថ្មី អាណត្តិទី៧នេះ លោក ឱម យ៉ិនទៀង ត្រូវបានបន្តតំណែងជាទេសរដ្ឋមន្ត្រី និងជាប្រធានអង្គភាពប្រឆាំងអំពើពុករលួយដដែល ខណៈលោក បានដឹកនាំអង្គភាពនេះ តាំងពីឆ្នាំ២០១០។ នៅក្នុងកំឡុងជាមួយគ្នានេះ លោក ក៏មានកូនប្រុសស្រីចំនួន៣រូប កំពុងកាន់តំណែងជាន់ខ្ពស់តាមក្រសួងស្ថាប័នរដ្ឋផ្សេងៗគ្នា ជាអាទិ៍ អង្គភាពប្រឆាំងអំពើពុករលួយ ក្រសួងការបរទេស និងក្រសួងប្រៃសណីយ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែង កូនប្រុសម្នាក់របស់លោកទេសរដ្ឋមន្ត្រី ឱម យ៉ិនទៀង គឺលោក យ៉ិនទៀង ពុទ្ធិរិទ្ធ កំពុងបម្រើការងារនៅក្រោមដំបូលអង្គភាពជាមួយឪពុករបស់លោក ក្នុងតួនាទីជាអនុប្រធានអង្គភាពប្រឆាំងអំពើពុករលួយ។ មុនទទួលបានតួនាទីជាអនុប្រធានអង្គភាពប្រឆាំងអំពើពុករលួយ លោក យ៉ិនទៀង ពុទ្ធិរិទ្ធ មានតួនាទីជាឧបការីនៃអង្គភាពប្រឆាំងអំពើពុករលួយ ដែលបានតែងតាំង កាលពីឆ្នាំ២០១៦។

ជាមួយគ្នានេះ កូនប្រុសម្នាក់ទៀត ក៏ធ្លាប់បម្រើការងារនៅអង្គភាពប្រឆាំងអំពើពុករលួយនេះដែរ គឺលោក យ៉ិនទៀង ពុទ្ធិរ៉ា ។ លោក យ៉ិនទៀង ពុទ្ធិរ៉ា ត្រូវបានព្រះមហាក្សត្រកម្ពុជា តែងតាំងជាឧបការីនៃអង្គភាពប្រឆាំងអំពើពុករលួយ ដែលមានឋានៈស្មើអនុរដ្ឋលេខាធិការ កាលពីឆ្នាំ២០១៦។ ក្រោយមក កូនប្រុសរបស់លោក ឱម យ៉ិនទៀង រូបនេះ ក៏បានផ្លាស់ប្ដូរភារកិច្ច និងត្រូវបានតែងតាំងមុខតំណែងជារដ្ឋលេខាធិការក្រសួងប្រៃសណីយ៍ និងទូរគមនាគមន៍ កាលពីអំឡុងខែវិច្ឆិកា ឆ្នាំ២០២០ រហូតដល់អាណត្តិទី៧នេះ លោក យ៉ិនទៀង ពុទ្ធិរ៉ា ក៏បានបន្តជារដ្ឋលេខាធិការនេះដដែល។

ដោយឡែក កូនស្រីម្នាក់ទៀតរបស់លោក ឱម យ៉ិនទៀង គឺលោកស្រី យ៉ិនទៀង ពុទ្ធិរស្មី គឺកំពុងកាន់តំណែងជារដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ ក្នុងអាណត្តិថ្មីនេះដែរ។ លោកស្រី យ៉ិនទៀង ពុទ្ធិរស្មី បានធ្វើជារដ្ឋលេខាធិការក្រសួងការបរទេសនេះ តាំងពីដើមឆ្នាំ២០២២។ មុនមកកាន់តំណែងជាន់ខ្ពស់នៅក្រសួងការបរទេស នាពេលនេះ លោកស្រី ក៏ធ្លាប់ធ្វើជានាយកខុទ្ទកាល័យឱ្យឪពុកលោកស្រីផងដែរ ក្នុងចន្លោះឆ្នាំ២០១៧ ដល់ឆ្នាំ២០២២៕