ឯកអគ្គរាជទូតកម្ពុជាប្រចាំកូរ៉េដឹកនាំគណៈប្រតិភូសមាគមពាណិជ្ជកម្មកូរ៉េ បំពេញទស្សនកិច្ចខេត្តព្រះសីហនុ

លោកស្រី ជ្រឹង បុទុមរង្សី ឯកអគ្គរាជទូតកម្ពុជា ប្រចាំសាធារណរដ្ឋកូរ៉េ អមដោយលោក ខាត់ ចិន អនុព័ន្ធពាណិជ្ជកម្ម បានផ្តួចផ្តើមរៀបចំ និងសម្របសម្រួលដំណើរទស្សនកិច្ចរបស់សមាគមពាណិជ្ជកម្មអន្តរជាតិកូរ៉េ (Korea International Trade Association-KITA) ដឹកនាំដោយលោក Jeong Marn-ki ជាអនុប្រធានសមាគមនៅខេត្តព្រះសីហនុ។

ដំណើរទស្សកិច្ចនេះបានធ្វើឡើងនៅថ្ងៃទី ១២ ខែកញ្ញា ឆ្នាំ២០២៣ ក្នុងគោលបំណងពិនិត្យមើលពីសក្តានុពល នៃកិច្ចសហប្រតិបត្តិការរវាងប្រទេសទាំងពីរដោយផ្តោតទៅលើវិស័យពាណិជ្ជកម្ម និងការវិនិយោគ។

លោកស្រីឯកអគ្គរាជទូតកម្ពុជាមានប្រសាសន៍ថា ការដឹកនាំគណៈប្រតិភូសមាគមអន្តរជាតិកូរ៉េនាពេលនេះ មានគោលបំណងពីរទី ១.ដឹកនាំសមាគមអន្តរជាតិរបស់កូរ៉េ មកធ្វើទស្សនកិច្ចសិក្សាឈ្វេងយល់ពីសក្តានុពលរបស់ខេត្តព្រះសីហនុ ២.ក្រុម ហ៊ុនឯកជនចំនួន៤ បានចូលរួមដំណើរទស្សនកិច្ច ដើម្បីឈ្វេងយល់ពីសក្តានុពលពាណិជ្ជកម្ម ការវិនិយោគ ពិសេសការនាំចេញនាំចូលរវាងប្រទេសកម្ពុជា-កូរ៉េ និងពិនិត្យលទ្ធភាពនៃការជំរុញពង្រឹងពាណិជ្ជកម្មរវាងប្រទេសទាំងពីរ។

លោកស្រីបានឱ្យដឹងបន្ថែមទៀតថា សមាគមអន្តរជាតិកូរ៉េមានចំណាប់អារម្មណ៍ក្នុងការជំរុញផ្នែកផលិត លើវិស័យឧស្សាហកម្ម ហើយសមាគម មានសមាជិករហូតដល់ ៧៥ ០០០ក្រុមហ៊ុន ហើយសមាគមបានធ្វើការវាយតម្លៃថា តើក្រុមហ៊ុនណាខ្លះដែលមានការចាប់អារម្មណ៍មកលើការវិនិយោគនៅកម្ពុជា ជាក់ស្តែងពួកគាត់បានចែករំលែកនៅក្នុងកិច្ចប្រជុំក្នុងចំណោមសមាជិកទាំងអស់ ក្នុងនោះ៤០ភាគ រយ មានគោលបំណងមកធ្វើការវិនិយោគនៅកម្ពុជា និង៣០​ភាគរយ នៃសមាជិកផ្សេងទៀត គាត់មានបំណងចង់សិក្សាបន្ថែមឱ្យស៊ីជម្រៅ ដើម្បីមកធ្វើការវិនិយោគនៅថ្ងៃអនាគត។

សមាគម ក៏បានលើកឡើងដែរថា ក្រៅពីប្រទេសវៀតណាម ប្រទេសឥណ្ឌូណេស៊ី កម្ពុជាជាប្រទេសទី៣ ដែលភាគីកូរ៉េ មានចំណាប់អារម្មណ៍ជាខ្លាំងក្នុងការដាក់ទុនវិនិយោគនៅក្នុងតំបន់អាស៊ីរបស់យើងនេះ។

លោកស្រីឯកអគ្គរាជទូតកម្ពុជា ប្រចាំសាធារណ រដ្ឋកូរ៉េ បានបន្ថែមថា កន្លងមកភាគីបរទេសភាគច្រើនពួកគាត់មិនទាន់បានឈ្វេងយល់ស៊ីជម្រៅអំពីស្ថានភាព ទាំងការអភិវឌ្ឍសេដ្ឋកិច្ចសង្គម ការវិនិយោគនៅកម្ពុជានៅឡើយទេ ដូច្នេះយើងតែងតែព្យាយាមរិះរកគ្រប់មធ្យោបាយទាំងអស់ ដើម្បីចែករំលែកព័ត៌មាន និងបទ ពិសោធន៍ទាំងអស់នេះ ជូនដល់ពូកគាត់តាមរយ:កិច្ច ប្រជុំការផ្សព្វផ្សាយ ហើយដំណើរទស្សនកិច្ចនាពេលនេះជាឧទាហរណ៍មួយបន្ថែមទៀត ដែលយើងព្យាយាមជំរុញឱ្យពួកគាត់កៀកកាន់តែជិតជាមួយប្រទេសកម្ពុជា ដើម្បីឈ្វេងយល់បន្ថែមចាប់ដៃជាមួយប្រទេសកម្ពុជាបន្ថែមទៀត ព្រោះប្រទេសកម្ពុជាជាប្រទេសមួយកំពុងតែមាន ការរីកលូតលាស់ មានសក្តានុពលធំមួយនៅក្នុងតំបន់អាស៊ីអាគ្នេយ៍របស់យើងនេះ យើងជំរុញឱ្យពួកគាត់ចាប់យកឱកាសមកធ្វើការវិនិយោគនៅពេលនេះ ដើម្បីចូល រួមអភិវឌ្ឍនៅក្នុងប្រទេសកម្ពុជា និងនៅក្នុងតំបន់អាស៊ី។

លោកស្រីបានថ្លែងអំណរគុណដល់សម្តេចធិបតី ហ៊ុន ម៉ាណែត ដែលសម្តេចតែងតែជួយជ្រោម ជ្រែងក្នុងកិច្ចការងាររបស់ស្ថានទូតកម្ពុជា ប្រចាំសាធារណរដ្ឋកូរ៉េ ហើយពេលថ្មីៗនេះសម្តេចបានផ្តល់កាដូដ៏ធំមួយជូនប្រជាពលរដ្ឋកម្ពុជា ដែលរស់នៅនិងធ្វើការនៅសាធា រណរដ្ឋកូរ៉េ ដោយអនុញ្ញាតឱ្យមានការធ្វើលិខិតឆ្លងដែនថ្មីនៅក្រៅប្រទេស ដែលចាប់ផ្តើមពីសាធារណរដ្ឋកូរ៉េនេះទៅ។

តាងនាមឱ្យប្រជាជនកម្ពុជា មន្ត្រីស្ថានទូត និងបង ប្អូនយើងដែលរស់នៅសាធារណរដ្ឋកូរ៉េ លោកជំទាវបានសម្តែងនូវអំណរគុណដល់សម្តេចធិបតី ដែលបានយកចិត្តទុកដាក់ដល់បងប្អូនយើងរស់នៅក្រៅប្រទេស និងអរគុណដល់ថ្នាក់ដឹកនាំទាំងអស់ដែលបានជួយជំរុញ ជ្រោមជ្រែងកិច្ចការទូតសេដ្ឋកិច្ចរបស់ស្ថានទូតកម្ពុជា ប្រចាំនៅសាធារណរដ្ឋកូរ៉េ ដើម្បីឱ្យយើងបង្កើនសក្តានុពល និងឥទ្ធិពលការទូតពាណិជ្ជកម្មរបស់កម្ពុជាទៅកាន់បណ្តាប្រទេសនៅលើឆាកអន្តរជាតិ៕

អត្ថបទ៖ ស៊ុយ ចាន់ធា