កម្ពុជាចំណេញ កេរ្ត៍ឈ្មោះ ជំនួយឧបត្ថម្ភ​ ពីការចុះបញ្ជីប្រាសាទកោះកេរជាសម្បត្តិបេតិកភណ្ឌពិភពលោក

លោក គង់ ពុទ្ធិកា អគ្គនាយកអាជ្ញាធរជាតិព្រះវិហារបានអះអាងថា កម្ពុជាចំណេញបានកេរ្តិ៍ឈ្មោះ ទទួលបានការយកចិត្តទុកដាក់ពីសំណាក់អ្នកជំនាញការ ទទួលបានជំនួយឧបត្ថម្ភដើម្បីជួសជុល និងអភិរក្សរមណីយដ្ឋានប្រាសាទកោះកេរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពីសន្និសីទសារព័ត៌មាន ស្ដីភាពជោគជ័យនៃការដាក់បញ្ចូលរមណីយដ្ឋានប្រាសាទកោះកេរ ក្នុងបញ្ជីសម្បត្តិបេតិកភណ្ឌពិភពលោក នាល្ងាចថ្ងៃទី១៩ខែកញ្ញានេះ លោក គង់ ពុទ្ធិកា បានគូសបញ្ជាក់ថា តាមរយៈការដាក់បញ្ចូលរមណីយដ្ឋានប្រាសាទកោះកេរចូលជាសម្បត្តិបេតិកភណ្ឌពិភពលោក កម្ពុជានឹងចំណេញបានកេរ្តិ៍ឈ្មោះជាអន្តរជាតិសម្រាប់រមណីយដ្ឋានប្រាសាទកោះកេរ និងសម្រាប់កម្ពុជាទាំងមូល។

កំឡុងសន្និសីទសារព័ត៌មាននៅអាកាសយានដ្ឋានអន្តរជាតិភ្នំពេញនេះ លោក គង់ ពុទ្ធិកា បានបន្តថា តាមរយៈការចុះបញ្ជីរមណីយដ្ឋានប្រាសាទកោះកេរ កម្ពុជានឹងទទួលបានការជួយយកចិត្តទុកដាក់ ទទួលបានអ្នកជំនាញការអន្តរជាតិពីអង្គការយូណេស្កូក្នុងការមកជួយផ្ដល់យោបល់លើការងារអភិរក្ស និងអភិវឌ្ឍន៍នៅក្នុងតំបន់រមណីយដ្ឋានកោះកេរ។

ជាពិសេស កម្ពុជានឹងទទួលបានជំនួយមូលនិធិសម្រាប់ការអភិរក្ស និងជួសជុល រមណីយដ្ឋានកោះកេរ ដូចការដែលប្រាសាទអង្គរវត្តទទួលបានជំនួយសម្រាប់អភិរក្ស និងជួសជុល នាពេលកន្លងមក៕

អត្ថបទដោយ៖ ង៉ិល ណារ៉ាត់